د اروپايي ټولنې او لویدیځ بالکان هیوادونو پر داسې یو پلان هوکړې ته رسیدلي چې موخه يي د لویدیځ بالکان هیوادونو له لارې اروپا ته د ناقانونه کډوالو د څپو مخنیوی بلل شوې. پر پولو د څار ډیرول او د ویزې په پالیسو کې سمون د دغه نوي پلان لومړیتوبونه دي.
صربیا د چهارشنبې په ورځ له هنګري او اتریش سره هوکړه وکړه چې د کډوالو د څپو د مخنیوي لپاره به له شمالي مقدونیې سره پر پوله امنیتي تدابیر زیات کړي. بل پلو اتریش ژمنه کړې ده چې دغې سرحدي سیمې ته به ۱۰۰ سرتېري واستوي.
د هنګري چارواکي وایي چې د دغه هېواد امنیتي ځواکونو د روان کال له پیل راهیسې څه باندې ۲۱۵ کډوال نیولي دي. دا هغه کسان دي چې له قانوني اسنادو پرته یې هنګري ته د ننوتو هڅه کړې ده.
د هنګري، اتریش او صربیا مشرانو پرون دوشنبه اروپا ته د غیر قانوني کډوالو د څپو د مخنیوي لپاره پر یو لړ اقداماتو موافقه وکړه. دغه غونډه چې د صربیا ولسمشر، د هنګري لومړي وزیر او د اتریش چانسلر پکې ګډون کړی و د هنګري په پلازمېنه بوداپست کې جوړه شوې وه.
له تېرې څه مودې راهیسې د بالکان پر مسیر د مهاجرو په شمېر کې زیاتوالی د دې سبب شوی دی چې د بالکان ځینې هېوادونه پر خپلو پولو امنیتي تدابیر زیات کړي. خو ولې مهاجر هڅه کوي چې د بالکان له لارې ځانونه اروپایي هېوادونو ته ورسوي؟
صربیایی سازمان کلیکاکتیو د یو مراکشي کډوال له قوله وایي چې د هنګري پوله ساتو ځواکونو له صربیا سره پر پوله د نوموړي سر ور خرېیلی دی. د راپورونو له مخې په تېرو څو میاشتو کې د هنګري او صربیا پر پوله د کډوالو پر وړاندې د تاوتریخوالي په پېښو کې زیاتوالی راغلی دی.
د اروپا د بشري حقونو محکمې هنګري د یوې افغانې کورنۍ د زنداني کولو په تور ۱۵۰۰۰ یورو جریمه کړې ده. محکمې ویلي دي چې د هنګري حکومت په ۲۰۱۸ کې دغه څلور کسیزه کورنۍ د روزکې ترانزیت زون کې زنداني کړې او د کورنۍ پر مشر یې هم د خوړو وېشل بند کړي وو.
د لوموند ورځپاڼې د یو راپور له مخې نن سبا زرګونه کډوال د صربیا له شمالي سیمې څخه هنګري ته د ورتګ هڅه کوي. په ورته مهال سازمانونه وایي چې د ۲۰۱۵ د کډوالۍ کړکېچ راهیسې دا لومړی ځل دی چې صربیا کې د کډوالو شمېر کې په بې سارې توګه زیاتوالی راغلی دی.
د رومانیا ځواکونو پرون چهارشنبه د دغه هېواد د نادلاک ۲ سرحدي پوسته کې تر ۱۰۰ ډېر کډوال نیولي دي چې په دوو لاریو کې سپاره وو.
د رومانیایي رسنیو په حواله تېره دوشنبه د دغه هېواد د پیتیا سیمې په سرحدي پوسته کې په یوه لارۍ کې ۵۰ کډوال نیول شوي چې د پاکستان، هند او بنګله دېش اتباع دي.
د هنګري چارواکي وایي چې د جمعې او یکشنبې په ورځو کې د دغه هېواد په مرکزي او سوېلي سیمو کې دوو بېلابېلو ترافیکي پېښو درې کډوال وژلي او تر ۳۰ تنه نور یې ټپیان کړي دي.
د هنګري چارواکي وایي چې د روان کال تر دې دمه یې دغه هېواد ته د ۱۵۰ زره مهاجرو د اوښتو مخه نیولې ده. تېر کال همدې موده کې هنګري ته د ۴۳ زره مهاجرو د داخلېدو مخنیوی شوی و. هنګري په وار وار په دې تورنه شوې ده چې مهاجر په ناقانونه او تاوتریخجنه طریقه له خپلو پولو څخه په شا تمبوي.