حسام غواړي تحصيل وکړي
حسام غواړي تحصيل وکړي

حسام د سوريې په هيواد کې کوڼ او ګونګی پيدا سوی دی. وروسته هغه په اتريش کې د مهاجر په توګه خپل ځان ته معلولتوب خنډ ونه باله او په لوی اليکترونيکی شرکت کې کار کوي.

حسام د زيمنس شرکت د اُتريش هيواد په څانګه کې د هغه وروسته حرفوي زدکړې پېل کړې، چې مخکې يې څلور مياشتې د ژبي کورسونه وويل او د منځنۍ دورې د ښوونځي بریليک يې تر لاسه کړ. په ياد شرکت کې د تخنيکي زدکړو له پاره ياد اسناد اړين ول.

هغه ۲۳ کلن دی او پراخه مُسکا لري. هغه له سوريې څخه تر اتريش پورې پر ځان اوږد سفر منلی چې زدکړې وکړي. د حسام مور وايي: «کله چې زه په حسام اميندواره وم نو آلماني شري نېولې وم او ډاکټرانو راته وويل چې ښايي ماشوم دې ناروغ پيدا سی.»

حسام د پيدايښت پر وخت نورمل معلوم سو خو مور يې هغه وخت د هغه په کوڼوالي او ګونګي والي خبره سوه چې د نوموړي عمر ۱۸ مياشتې ؤ.

د ۹ کالو په عمر د حسام د غوږونو عمليات تر سره سول چې د هغه د اورېدو قابليت بهتره کړي. خو دا چې په سوريه کې د جګړې پر وخت امکانات ډېر کم سوي ول نو هغه ځانګړې آله چې د حسام په غوږ کې ايښودل سوې وه پر وخت بدله نه سوه. د حسام مور وايي چې د سوريې جګړه د دې لامل سوه چې د حسام د اورېدنې او خبرو کولو پر وړتيا بد اغېز وکړي.

د حسام مور. کرېډېټ: ا. سلیم

د معلولتوب سره مبارزه

د سوريې په حُمس کې د جګړې له کبله د حسام کورنۍ و لبنان ته مهاجره سوه. هغوی وروسته و ترکيې او بيا اروپا ته مهاجر سول.

په لومړي سر کې د حسام پلار په يوازي سر اروپا ته سفر وکړ. خو د هغه کورنۍ ډېر ژر په اروپا کې د هغه سره يوځای کړل سوه. هغه وخت د حسام عمر ۱۸ کاله ؤ او دی لا د خپلې کورنۍ سره نه ؤ يوځای سوی. خو په ۲۰۱۵ کال د کورنيو د يوځای کولو په اروپايي پروګرام کې حسام هم په اروپا کې د خپلې کورنۍ سره يوځای سو.

د حسام مور او پلار زياتې هلي ځلي کړي چې حسام ته ښه تعليم ورکړي. د هغه پلار وايي: «حسام ډېرې جګې ارادې لري او زده کول يې زيات خوښېږي. هغه هوښيار دی او رسم کول ډېر خوښوي.»

د هغه پلار زياتوي: «هغه په خپله په انټرنټ کې لټون وکړ چې نړيوال سازمان پيدا کړي چې ورسره مرسته وکړي. هغه وروسته په ښوونځي کې داخله واخيسته.»

په اروپا کې د حسام د غوږ دويم ځل عمليات تر سره سول او هغه ته ځانګړې اليکترونيکی د اورېدو آله نصب کړل سوه چې له کبله يې اوس روغتيايي وضعه ډېره بهتره سوې ده.

 لاس ته راوړنې او آرزوګانې

حسام په اتريش کې صرف څلور مياشتې د ګونګيانو په ژبه زدکړې وکړې او د منځنۍ دورې د ښوونځي بريليک يې په لاس راوړ. دا يو له هغو اړينو اسنادو څخه ؤ چې حسام د زيمنس په شرکت کې د حرفوي زدکړې پېل کړلای سي.

د زيمنس شرکت د ګونګيانو په ژبه درس ورکونکی يو ښوونکی استخدام کړی چې د حسام سره د حرفوي زدکړو په دويم کال په درسونو کي مرسته وکړي. د حرفوي زدکړو دغه پروګرام څلور کاله دوام کوي.

حسام کډوال نیوز
 ته وويل: «زه د ژبني درس پر وخت په پوهېدلو کې ستونزي لرم دا ځکه چې د خپلو نورو همصنفيانو په پرتله کم وخت په اتريش کې پاته سوی يم.»

 حسام دا آرزو او هيله لري چې په اتريش کې د عالي ليسې بريليک په لاس راوړي. کرېډېټ: ا. سلیم

حسام دا آرزو او هيله لري چې په اتريش کې د عالي ليسې بريليک په لاس راوړي تر څو هغه وکولای سي چې په بيو ميديکل انجينيرينګ برخه کې تحصيل وکړي.

حسام وايي چې نه يوازې غواړي چې کار وکړي بلکه هغې ټولنې ته چې ده ته يې ځای ورکړی هم يو څه بېرته ورکړي. نوموړي د اتريش دننه په هغه فوروم او اتحاديه کې ځان ثبت کړی دی چې د ګونګيانو انسانانو ژباړه کوي. هغه په مسکا وايي: «زه غواړم د هغو خلکو سره کومک سم چې زما په شان د ستوزې سره مخامخ دي.»

ليکونکی: محی الدين حسين