یک سرباز تاجیک در منطقه مرزی با افغانستان. عکس از دویچه وله
یک سرباز تاجیک در منطقه مرزی با افغانستان. عکس از دویچه وله

گزارش‌های رسیده از تاجیکستان حاکی از آن ست که اخراج مهاجران افغان از این کشور افزایش یافته است. گفته می‌شود طی سه هفته اخیر مقام‌های تاجیک حدود ۲۰۰ مهاجر را به افغانستان برگردانده‌ اند.

به گزارش سایت انترنتی یورآسیا، مقام‌های تاجیکستان در سه هفته گذشته حدود ۲۰۰ مهاجر افغان را اخراج کرده‌اند. تعدادی از اخراج شدگان در شبکه‌های اجتماعی گفته‌اند که نیروهای امنیتی وارد منازل آن‌ها شده و به بهانه کنترول اسناد، آن‌ها را به مرز انتقال داده‌اند.

سازمان‌های خیریه در تاجیکستان به مهاجران توصیه کرده‌اند که بدون نیاز عاجل، از خانه‌های خود بیرون نروند. گزارش شده که تعدادی از خانواده‌ها به سفارت افغانستان در تاجیکستان پناه برده‌اند که از سوی ماموران حکومت پیشین افغانستان اداره می‌شود.

خبرگزاری آسیا پلاس از قول وزارت داخله تاجیکستان نوشته است که مهاجران اخراج شده از قوانین تاجیکستان سرپیچی کرده بودند. به گفته مسئولان، تنها یک مهاجر که اسناد قانونی با خود داشته اخراج شده است.

با این حال تلویزیون طلوع افغانستان از قول مهاجران مقیم تاجیکستان گزارش داده است که تعدادی از مهاجران با وجود داشتن اسناد قانونی به افغانستان برگردانده شده‌اند.

یک زن مهاجر افغان به این شبکه گفته است که مقام‌های تاجیک هفته گذشته شوهرش را که اسناد قانونی داشت اخراج کردند. این خانواده از چهارسال به این سو در تاجیکستان زندگی می‌کند.

سازمان ملل متحد در هفته اخیر ماه اگست از اخراج مهاجران از تاجیکستان اظهار نگرانی کرد و از مقام‌های تاجیک خواست که اخراج‌ها را متوقف کنند.

در همین زمینه: نگرانی سازمان ملل از اخراج مهاجران افغان از تاجیکستان

 

در همین زمینه