د تحریر هیئت

• د چک جمهوريت

د چک جمهوریت چارواکي وایي چې په پام کې لري چې سر له راتلونکې پنجشنبې به د غیرقانوني کډوالو د څپو د مخنیوي لپاره له سلواکیا سره پر پوله امنیتي پوستې جوړې کړې.

• یونان

د ځایي رسنیو د راپورونو له مخې، د یونان او ترکیې ترمنځ اوبو کې یو افغان کډوال له خپلو درېو ماشومانو سره یو ځای د کښتۍ ډوبېدو پېښه کې وژل شوی دی.

• ایټالیا

د فراتېلي دېټالیا ښي اړخي ګوند مشرې جیورجیا ملوني پرون یکشنبه د سپټمبر ۲۵مه د ایټالیا په پارلماني ټاکنو کې تر ټولو زیاتې رایې ګټلې دي. تمه کېږي چې نوموړې له ماتیو سالویني او سلویو برلسکوني سره ایتلافي حکومت رامنځته کړي.

• بلغاریه

د بلغاریا حکومت د کډوالو د څپو د مخنیوي لپاره د دغه هېواد په بورګاس، یامبول او هاسکوو سیمو کې بېړنی حالت اعلان کړی دی. د چارواکو په حواله، د روان کال له پیل راهیسې تر ۱۰۰ زره ډېرو کډوالو بلغاریا ته د داخلېدو هڅه کړې ده.

• یونان
• ترکيه

ترکي چارواکي وایي چې د ترکیې او یونان ترمنځ اوبو کې د کډوالو کښتۍ ډوبېدو پېښه کې د څلورو ماشومانو په ګډون ۶ تنه مړه شوي دي. د چارواکو په حواله، دغه مهاجر یوناني ځواکونو له خپلو اوبو څخه په شا تمبولي وو.

• فرانسه

نن جمعه سهار وختي د پاریس له بستي څخه هغه ۸۰ ځوان کډوال ایستل شوي چې له ۱۱۹ ورځو راهیسې یې یاد ډګر کې خیمې تړلې وې. که څه هم چارواکو دغو کډوالو ته سرپناوې برابرې کړې، خو یوتوپیا ۵۶ سازمان چې یاد پنډغالی یې جوړ کړی و د دوی د نامعلوم برخلیک په هکله اندېښنه څرګندوي.

• بلغاریه

د بلغاریا چارواکي وایي‌ چې د تور سمندرګي په شمال ختیځه شبلا دماغه کې د کډوالو یوه ډله موندلې ده چې ویل کېږي افغانان هم پکې شامل دي.

• فرانسه

له ناقانونه کډوالۍ سره د مبارزې مرکزي اداره وایي چې د فرانسې په شمالي سیمه کې یې د انساني قاچاقبرو یوه مهمه ډله له منځه وړې ده. د عراقي کردانو دغې ډلې د انګلیس کانال له لارې کډوال برېتانیا ته انتقالول. د دې عملیاتو په پایله کې د سمندري وسایلو یوه ډیپو هم موندل شوې ده.

• آلمان

د آلمان حکومت غواړي چي د ال جي بي ټي کيو ټولنې پناه غوښتونکو ته له دې وروسته په آلمان کي د محافظت بهتر امکانات برابر کړي.

• ایټالیا

د «اوپن آرمز اونو» مرستندويه کښتۍ ۴۰۲ مهاجر په بيلو عملياتو کي له اوبو څخه ژغورلي دي. اوس ورته اجازه ورکول سوېده چي د سيسلي بندر ته داخله سي.

• یونان
• ترکيه

د ترکیې ساحلي ځواکونه وایي چې د چهارشنبې په ورځ یې د یو لړ عملیاتو په پایله کې د دغه هېواد په ساحلي اوبو کې ۲۵۵ کډوال ژغورلي دي. په وینا یې یاد کډوال یوناني ځواکونو د ترکیې پر لور شړلي دي.

• سلونيا

د سلوانیا امنیتي ځواکونه وایي چې د سه شنبې په شپه په یوه اورګاډي کې تر ۱۰۰ ډېر پناه غوښتونکي نیولي دي چې ایټالیا ته یې د ورتګ هڅه درلوده.