د ایټالیا لومړی وزیر ګیسپ کونته د پنجشنبې په ورځ (د اګست ۱۵مه) وویل، شپږ اروپایي هیوادونه چمتو دي چې اوپن ارمز کښتۍ کې ۱۵۰ سپرو کډوالو ته پناه ورکړي. یاده کښتۍ له څو ورځو راهیسې د ایټالیا ساحلي اوبو ته نږدې بنده پاتې ده.
اسپانوي چارواکي د سه شنبې په ورځ (د اګست ۱۳) د پرواکتیوا اوپن ارمز سازمان هغه غوښتنه رد کړه چې وایي اسپانیا دې اوپن ارمز کښتۍ کې سپرو ۳۱ کم عمره کډوالو ته پناه ورکړي. د اسپانیا د پرمختګ وزیر خوزه لویس ابالوس وایي دغه غوښتنه کوم «حقوقي ارزښت» نه لري.
د فرانسې د کډوالۍ او ادغام اداره یا اوفي د دوشنبې په ورځ (د اګست ۱۲مه) په یوه خبرپاڼه کې وویل، د پناه غوښتونکو نوي کارتونو – چې یوازې د پیسو ادا کولو له پاره دي – د روان کال د نومبر میاشتې په ۵ نېټه فعالېږي. له دې مخکې ویل شوي وو چې یاد کارتونه به په سپټمبر میاشت کې فعال شي.
د برتانیا د کورنېو چارو وزارت وایي د جمعې په ورځ یې مانش کانال کې ۳۰ کډوال نیولي او برتانیا ته یې وړلي دي. بل لور ته د فرانسې د بولونی – سور – مېر سیمې په ساحلي اوبو کې ۱۱ کډوال موندل شوي دي.
د جمعې او شنبې په ورځو د ۱۷۰ کډوالو تر ژغورلو وروسته د اس او اس مدیترانې او د بې سرحده ډاکټرانو کښتۍ اوشېن وایکنګ ۸۱ نور کډوال له مدیترانې څخه وژغورل. اوس مهال یاده کښتۍ کې ۲۵۱ کسان سپاره دي.
د جمعې په شپه اسپانوۍ کښتۍ اوپن ارمز ۳۹ کډوال په مدیترانه کې وژغورل. مالتا د یادو کډوالو منلو ته چمتووالی ښودلی، خو تر اوسه پورې د هغو ۱۲۱ کډوالو سرنوشت نامعلوم دی چې ۹ ورځې مخکې په مدیترانه کې ژغورل شوي وو. اوپن ارمز وایي چې مالتا باید ټول ژغورل شوي کډوال ومني.
د شمالي مقدونیې پولیسو وایي چې په یوه سپورټي موټر کې یې ۲۲ پاکستاني او بنګله دېشي کډوال موندلي دي. پولیسو زیاتوي چې موټر چلوونکی یې هم نیولی دی.
د بوسنیا یوه ځایي ټلویزیون د چهارشنبې په ورځ وویل، د بوسنیا او کروېشیا په ګډه پوله کې ټپي شوي ۱۸ کډوال د دې هیواد د لوېدېځې سیمې یوه روغتیایي مرکز ته وړل شوي دي.
اسپانوۍ ټولنه پرواکتیوا اوپن ارمز د چهارشنبې په ورځ وویل، مالتایي چارواکي د یادې ټولنې هغې کښتۍ ته د مالتا ساحلي اوبو ته د ننوتلو اجازه نه ده ور کړې چې له مدیترانې څخه ژغورل شوي ۱۲۱ کډوال په کې سپاره دي. تر دې دمخه ایټالیا هم یادې کښتۍ ته خپلو ساحلو ته د ننوتلو اجازه نه وه ورکړې.
د کډوالو په چارو کې د ملګرو ملتونو اداره د سه شنبې په ورځ د ایټالیا حکومت نوی فرمان د «اندېښنې وړ» وباله. د دوشنبې په ورځ د ایټالیا مشرانو جرګه د دې هیواد د کورنیو چارو وزیر ماتیو سالویني هغه فرمان تصویب کړ چې د کډوالو پر ژغورنې کښتیو نوي بندیزونه لګوي.
برتانوي چارواکي وایي چې د شنبې په ورځ یې مانش کانال کې نږدې ۵۰ کډوال نیولي دي. یاد کسان غوښتل چې په کوچنیو بېړیو کې برتانیا ته ځان ورسوي.
د اس او اس مدیترانې او د بې سرحده ډاکټرانو سازمان کښتۍ «اوشېن وایکنګ» د یکشنبې په شپه د فرانسې د مارسۍ له بندره د لیبیا ساحلي اوبو په لور روانه شوه. اټکل دی چې یاده کښتۍ به مرکزي مدیترانه کې د کډوالو د ژغورنې عملیاتونه ترسره کړي.