یوه بریتانوۍ سازمان په خپل یو راپور کې ویلي چې روانډا ته د اخراج ګواښ، د کډوالو رواني روغتیا له جدي ګواښ سره مخامخ کړی. دغه سازمان ویلي چې حتی د کډوالو په منځ کې د ځان وژنې هڅې هم ډیرې شوې دي.
د بریتانیا په محکمه کې یو شمیر وزیرانو په رونډا کې د کډوالو د ناوړه بشري وضعیت او په ناقانونه د یو شمیر افغانانو د بیرته ستنولو په اړه خبرداری ورکړ. په ورته مهال لندن کې له محکمې د باندې یو شمیر خلک د اعتراض په ډول راټول شوي و او روانډا ته د کډوالو د استولو په اړه يي د حکومت پر سیاستونو نیوکه کوله.
په افغانستان کې د طالبانو له واکمنۍ سره سم د تیر کال د اګست په ۱۵مه، د نورو هیوادونو په څیر جرمني او فرانسې هم له کابل څخه په پوځي الوتکو کې د افغانانو د ایستلو لړۍ پیل کړه چې له امله يي لسګونه زره افغانان دغو دوو هیوادونو ته انتقال شول.
برېتانیا وایي سر له راتلونکې مني به مجرم او متخلف کډوال باید داسې ځېرک ساعتونه په لاس کړي چې د څېرې د پېژندنې امکان برابروي. د دغه هېواد د کورنیو چارو او عدلیې وزارتونه وایي چې دغه بندیز پر پناه غوښتونکو نه عملي کېږي، خو سازمانونه خبرداری ورکوي چې یاده تکنالوژي له بشري حقونو څخه د سرغړونې لامل ګرځېدلی شي.
د بشري حقونو سازمانونه وایي چې د کابل له سقوط څخه یو کال وروسته برېتانیا له افغانستان څخه د افغانانو په ایستلو کې پاتې راغلې ده. سلګونه ښوونکي، ژباړونکي او د برېتانوي شرکتونو افغان همکاران برېتانیا کې د مېشتېدو د اجازه لیکونو د ترلاسه کولو سربېره لا هم په افغانستان کې بند پاتې دي.
د بریتانیا د پارلمان یو غړی ویلي چې یو ۱۱ کلن افغان ماشوم له خپلې کورنۍ سره د یو ځای کیدو لپاره په غلطۍ سره د بریتانیا پر ځای فرانسې ته لیږدول شوی. د پارلمان د محافظه کار ګوند غړي په دې اړه پر حکومت سخته نیوکه کړې.
د بریتانیا پولیسو په لندن کې هغه درې تنه نیولي چې هڅه يي کوله کډوال د لارۍ تر شا بریتانیا ته قاچاق کړي. نیول شوي کسان د هغو څلور تنو له ډلې دی چې د سه شنبې په سهار د لندن په ختیځ او ایسیکس کې د ملي جرمونو د ادارې په عملیاتو کې نیول شوي وو.
فرانسوي چارواکو د تېرې جمعې په ورځ د فرانسې په شمالي سیمه لفرینکوک ساحل ته نږدې د کډوالو یوه بېړۍ ژغورلې ده چې ۵۱ کسان پکې سپاره وو. د سختو د امنیتي تدابیرو سربېره لا هم ګڼ شمېر کډوال هڅه کوي چې د یاد سمندر له لارې برېتانیا ته واوړي.
د بي بي سي د یو خبر له مخې د برېتانیا په یوه توقیف ځای کې نږدې ۲۰ پناه غوښتونکو روانډا ته د استول کېدو د خبر له ترلاسه کولو وروسته د نه خوړو اعتصاب کړی دی.
د بریتانیا د کورنیو چارو وزارت ویلي چې د کال په لومړیو دریو میاشتو کې د پناه غوښتنې شمیر ۵۵۱۴۶ ته لوړ شوی چې له دې سره په تیرو دوو لسیزو کې د پناه غوښتنې شمیر تر ټولو لوړې کچې ته رسیدلی. د بخښنې نړیوال سازمان حکومت په دې اړه په ناکامۍ تورنوي او وايي چې د پناه غوښتونکو دوسیو ته يي په وخت سره رسیدنه نه ده کړې. د یاد وزارت په راپور کې همدارنګه ویل شوي چې فرانسې څخه بریتانیا ته د کښتیو له لارې د رسیدلو کډوالو لویه برخه افغانان دي.
د فرانسې ختیځ ګراند سینت ته نږدې د چهارشنبې په سهار پولیسو د کډوالو د هغه ستر کمپ د ړنګولو عملیات پیل کړل چې د یکشنبې ورځې راهیسې په کې د کډوالو ترمنځ د نښتو له امله یو تن مړ او درې نور ټپیان شوي و. شاوخوا ۵۰۰ کډوال په دغه کمپ کې بریتانیا ته د تګ لپاره انتظار و.
د بریتانیا د کورنیو چارو وزارت منلي چې یو شمیر هغه پناه غوښتونکي يي نیولي چې رونډا ته يي د استولو په اړه پریکړه شوې.چارواکي ویلي چې بریتانیا ته په وړو کښتیو کې رسیدلي دغه خلک اوس په توقیف مرکزونو کې ساتل کیږي. نیول شویو کسانو کې یو افغان هم شامل دی.