د کډوالو د ملاتړ کاروان پرون چهارشنبه د فرانسې کالې ښار ته ورسېد. ټاکل شوې ده چې یاد کاروان به له فرانسې څخه د بلجیم پلازمېنې بروکسل ته ولاړ شي. د دغه کاروان ګډونوال د اروپا پر مهاجرتي سیاستونو نیوکه کوي او وایي چې د کډوالو حقونو ته باید درناوی وشي.
فرانسوي انځورګر او ښوونکي ستېفان ترتز د فرانسې په الزاس سیمه کې د افغانو ښځو د انځورونو نندارتون جوړ کړی دی. دغه نندارتون چې ښځه او ژوند نومېږي د افغانو مېرمنو مبارزه پکې انځور شوې ده.
د ۲۰۲۳ کال د بودیجې د لایحې له مخې، د فرانسې حکومت په پام کې لري چې راتلونکی کال به د هرکلي په بېلابېلو مرکزونو کې کډوالو او پناه غوښتونکو ته ۵۹۰۰ نورې سرپناوې جوړې کړي.
نن جمعه سهار وختي د پاریس له بستي څخه هغه ۸۰ ځوان کډوال ایستل شوي چې له ۱۱۹ ورځو راهیسې یې یاد ډګر کې خیمې تړلې وې. که څه هم چارواکو دغو کډوالو ته سرپناوې برابرې کړې، خو یوتوپیا ۵۶ سازمان چې یاد پنډغالی یې جوړ کړی و د دوی د نامعلوم برخلیک په هکله اندېښنه څرګندوي.
له ناقانونه کډوالۍ سره د مبارزې مرکزي اداره وایي چې د فرانسې په شمالي سیمه کې یې د انساني قاچاقبرو یوه مهمه ډله له منځه وړې ده. د عراقي کردانو دغې ډلې د انګلیس کانال له لارې کډوال برېتانیا ته انتقالول. د دې عملیاتو په پایله کې د سمندري وسایلو یوه ډیپو هم موندل شوې ده.
د فرانسې د لیل ښار د ادارې محکمې راپور جوړوونکي پل ګروش د سه شنبې په ورځ کالې ښار کې پر کډوالو د خوړو د وېشلو بندیز «نامتناسب» وباله. نوموړي د کالې قومندانۍ د دغې پرېکړې د لغوه کېدو غوښتنه وکړه او و یې ویل چې د چارواکو له خوا وړاندي شوي دلایل بې بنیاده دي.
د برېتانیا ساحلي ځواکونه وایي چې پرون پنجشنبه د سپتمبر ۱۵ یې د کنت په ساحلي اوبو کې هغه ۳۸ کډوال ژغورلي دي چې کښتۍ یې په سمندر کې ډوبه شوې وه. په ورته مهال ۶۱۷ تنه نور برېتانیا ته اوښتي دي.
د بريتانيې د حکومت رسمي ارقام ښيي چي په روان ۲۰۲۲ عيسوي کال تر اوسه د تېر بشپړ کال په پرتله زیات مهاجر د مانش کانال له لاري له فرانسې و بريتانيې ته اوښتي دي.
د فرانسې د بولونی سور مېر محکمې د سه شنبې په ورځ یو عراقی کډوال په ۱۸ میاشتو بند محکوم کړ. نوموړی هغه مهال د پولیسو له خوا ونیول شو چې په یوه لارۍ کې یې ۲۵ کډوال انتقالول.
برېتانوي چارواکي وایي چې د شنبې او یکشنبې په ورځو کې تر ۲۰۰۰ ډېر کډوال د انګلیس کانال له لارې دغه هېواد ته اوښتي دي. بل پلو بیا فرانسوي چارواکو یاد کانال کې د نږدې ۳۰۰ کډوالو د ژغورلو خبر ورکړی دی.
مهاجر پلوه سازمانونه وایي چې دمګړۍ د پاریس په شمالي سیمه کې نږدې ۸۰ افغان کډوال د سړکونو پر غاړه شپې سبا کوي او د پولیسو له خوا له فشار سره مخ دي. پنځه ویشت کلن اسرار رحیمي یو له دغو کډوالو دی چې وایي له میاشتو راهیسې سرپناه نه لري.
برېتانوي چارواکي وایي چې نږدې دوه سوه کډوال د تېرې سه شنبې په ورځ د انګلیس کانال له لارې برېتانیا ته اوښتي دي. فرانسوي چارواکي بیا دغه سمندر کې د شاوخوا ۱۰۰ کډوالو د ژغورلو خبر ورکوي.