پاکستاني رسنیو راپور ورکړی چې ۳۶ پاکساني کډوال چې په ناقانونه ډول ایران ته د ننه شوي و،بیرته خپل هیواد ته استول شوي. له دې یوه ورځ وړاندې ۳۳ نور ناقانونه پاکستاني کډوال هم له ایران څخه ایستل شوي وو.
د بلغاریا رسنیو راپور ورکړی چې پولیسو ۳۴ ناقانونه کډوال له دوه کامیون موټر څخه چې فرانسې او جرمني ته يي سوداګریزي توکي لیږدولې، موندلي دي. دغه کډوال د موټرو د ننه په لرګي او نورو سوداګریزو توکو کې ځانونه پټ کړي وو.
پاکستاني رسنیو راپور ورکړی چې ایران د یکشنبې او چهارشنبې په ورځو، ۱۰۲ پاکستاني کډوال، د بلوچستان له لارې بیرته خپل هیواد ته استولي.دغه کډوال هڅه درلوده چې په ناقانونه لارو ځانونه ترکیې او اروپايي هیوادونو ته ورسوي.
د پاکستان چارواکي وایي چې د ایټالیا په سوېلي سمندرګي کې د کډوالو د کښتۍ ډوبېدو پېښه کې د پاکستان د هاکي لوبډلې پخوانۍ لوبغاړې شاهده رضا وژل شوې ده.
۲۰۰ نور افغانان چې ښځې او ماشومان هم په کې شامل و، د چهارشنبې په ورځ د پاکستان له زندانونو خوشي او بیرته خپل هیواد ته استول شوي. شاوخوا ۱۰۰۰ تنه افغانان لاهم د کراچۍ په زندانونو کې شپې او ورځې سبا کوي.
د پاکستان د بهرنیو چارو وزارت سرچینو تایید کړی دی چې د اروپا ځینو هېوادونو کې یې خپلو سفارتونو او قنسولګریو ته هدایت ورکړی دی چې د افغانستان اتباعو ته تر بیا امر پورې د ویزو له ورکولو ډډه وکړي.
د طالبانو د کډوالو او راستنیدونکو چارو وزارت خبر ورکړی چې د روانې اونۍ په دوو ورځو کې له څلور زرو ډیر افغان کډوال، له ایران څخه په جبري او خپله خوښه هیواد ته راستانه شوي. بل پلو د پاکستان له زندان څخه خوشي شوي افغانان هم بیرته افغانستان ته استول شوي.
په افغانستان کې د طالبانو له واکمنۍ وروسته، سلګونه افغان خبریالان او د رسنیو کارکوونکي په دې هیله پاکستان او ایران ته ولاړل تر څو له هغه ځایه د لودیځو هیوادونو ویزې ترلاسه کړي. یو شمیر دغه خبریالان یو ځل بیا په یوه اعتراضه غونډه کې ویلي چې د خبریالانو د ملاتړ بنسټونو او نړیوالې ټولنې لخوا هیر شوي او له نامعلوم برخلیک سره مخامخ دي. شاوخوا ۲۰۰ دغه خبریالان یوازې په پاکستان کې د خپلو ویزو په تمه دي.
په افغانستان کې د طالبانو له واکمنۍ وروسته د نورو افغانانو په څیر له ۲۰۰ څخه ډیر افغان خبریالان هم اړ شول تر څو پاکستان او ایران ته ولاړ شي او له هغه ځایه لویدیځو هیوادونو لپاره د ویزې غوښتنه وکړي. دغه خبریالان وايي چې له میاشتو انتظار وروسته په دغو دوو هیوادونو کې بې برخلیکه پراته دي او د ویزې او اقتصادي ستونزو سره لاس او ګریوان دي.
د ګارډین ورځپاڼې په یوه تازه راپور کې راغلي دي چې واک ته د طالبانو له رسېدو راهیسې څه باندې ۲۵۰ زره افغان کډوالو پاکستان ته پناه وړې ده. خو ډېری دغه کسان پاکستان کې د اخراج او یا زنداني کېدو له ګواښ سره مخ دي.
د پاکستان د کراچۍ ښار کې طالب چارواکي ویلي چې د محکمې لخوا د ۴۰۵ افغان بندیانو د خوشي کولو حکم صادر شوی خو له ۴۰۰ ډیر ماشومان او میرمنې لا هم په زندانونو کې شپې سبا کوي. له دې سره په تیرو دوو میاشتو کې دوه افغانان د کراچۍ په زندانونو کې مړه شوي.
د پاکستان د کراچۍ پولیسو یو ځل بیا د دغه ښار له بیلابیلو برخو څخه ۱۱ افغانان نیولي. پولیسو ویلي چې دغو افغانانو په کراچۍ کې په ناقانونه ډول استوګنه درلوده. دا په داسې حال کې ده چې په ټولنیز شبکو کې د پاکستان په زندانونو کې د افغان ماشومانو او میرمنو تصویرونه د افغانانو غصه راپارولې.