عبدالصبور، ژولیا دومون
عبدالصبور، ژولیا دومون

د پاریس د «پله رویال» په لور روان یم چېره چې عبدالصبور زما په انتظار کې دی. عبدالصبور یو ځوان افغان کډوال دی چې د ۲۰۱۷ د اکتوبر په میاشت کې فرانسې ته رسېدلی دی. د «پله رویال» په یوه کافه کې کېنو او قهوه څکو.

عبدالصبور په جلال اباد ښار کې زېږېدلی او لوی شوی دی. هغه په جلال آباد او کونړ کې له امریکایي پوځیانو سره کار کاوه. وظیفه یې ساده نه وه: د لوجیستیکي چارو مسول و. په ۲۰۱۵ کې عبدالصبور ګواښونو سره مخ کېږي او غواړي چې یو اروپایي هیواد ته ورشي. خو سفر یې اسانه نه دی. له افغانستانه تر ایرانه او له ایرانه تر بلګراد پورې. په بلګراد کې پولیسو د عبدالصبور د ګوتې نښې اخلي. خو عبدالصبور نه غواړي چې په دغه هیواد کې پاتې شي. په همدې خاطر په پټه کروېشیا ته ځي. کله چې کروېشیا ته رسېږي د کروېشیایي پولیسو له خوا بلګراد ته بېرته ډیپورت کېږي.

عبدالصبور چې امریکاییانو سره کار کاوه ښه انګریزي پوهېږي او دا یې د بریا راز دی. ځکه د انګریزي ژبې په واسطه ډېر کسان سره تماس نیسي. دا کسان په راتلونکې کې ورسره مرستې کوي.

عبدالصبور، ژولیا دومون

په بندي خانه کې

کله چې عبدالصبور بلګراد ته بېرته ډیپورت کېږي بیا یې هڅه کوي چې په پټه له بلګراد نه ووځي. خو دا وار د پولیسو له خوا نیول او بندي کېږي. په بندي خانه کې د خپل فېسبوک له لاري خلکو ته وایي چې په ناحقه بندي شوی دی. پولیسو ته هم وایي چې زه خو مجرم نه یم ولې باید په بندي خانه کې واوسېږم. صربیایي پولیسو وایي چې عبدالصبور باید محکمې ته لاړ شي.

عبدالصبور محکمې ته ځي. په محکمه کې قاضي ورته وایي چې باید د دریو ورځو په موده کې له بلګراد نه ووځي. خو دا اسانه نه ده. له همدې کبله عبدالصبور اعتراض کوي.

عبدالصبور د خپلو اشنایانو په مرسته له یو رضاکار سره تماس نیسي. یاد اتریشي رضاکار ورته وایي چې باید له سرحد نه په پټه تېر شي او بیا ورسره سلوانیا ته لاړ شي. عبدالصبور بله چاره نه لري او په پټه له سرحد نه تېرېږي. د سرحد نه ور اخوا اتریشي رضاکار په خپل موټر کې ناست دی او انتظار باسي. دوی یو ځای کېږي او سلوانیا ته ورځي.

د مهاجرت په لاره کې، عبدالصبور

خو مشکل دا دی چې سلوانیا هم کډوالو له پاره ښه ځای نه دی. یاد اتریشي رضاکار عبدالصبور ته پېشنهاد کوي چې ایټالیا ته لاړ شي. دوی ایټالیا ته ورځي خو په ایټالیا کې هم د کډوالو وضعیت ښه نه دی. عبدالصبور متوجه کېږي چې په ایټالیا کې زیات شمېر کډوال په سړکونو کې ژوند کوي او پولیسو هم له دوی سره مرسته نه کوي.

څه باید وکړو؟

یو بل ملګری یې ورته وایي چې فرانسې ته لاړ شه، په فرانسه کې د کډوالو وضعیت ښه دی. عبدالصبور له اتریشي رضاکار سره فرانسې ته راځي او په تولوز کې یو ملګری سره ګوري. خو ملګری یې وایي چې په فرانسه کې د کډوالو ژوند بالکل ښه نه دی. عبدالصبور بیا د یو رضاکار په واسطه هسپانیې ته ورځي چېره چې لکه فرانسه او ایټالیا د کډوالو وضعیت ښه نه دی. دا وار عبدالصبور غواړي چې قطعي تصمیم ونیسي او بیا فرانسې ته راشي.

د ایفل برج تر مخ

عبدالصبور د ایفل ټاور تر مخ دی خو په پاریس کې د اوسېدو ځای نه لري. په تصادفي ډول یو بل کډوال سره اشنا کېږي چې په بلګراد کې ورسره و. یاد کډوال چې ډوبلیني دی عبدالصبور ته پېشنهاد کوي چې ورسره د یو بل ملګری کور ته لار شي چې هغه هم کډوال دی. عبدالصبور یې مني او ۵ ورځو له پاره د نوی کډوال په کوټه کې اوسېږي چې په یوه دولتي ساختمان کې موقعیت لري. خو دا ډول ژوند د عبدالصبور نه خوښېږي.

عبدالصبور، ژولیا دومون

د هسپانیې او بلجیم په لور کې

دا ځل عبدالصبور له یوه رضاکاره سره تماس نیسي او هسپانیې ته ورځي. څو ورځو له پاره په بارسلونا کې د یادې رضاکاره په کور کې اوسېږي او بیا سراګوسا ته ځي. په سراګوسا کې خلک ورته وایي چې بلجیم ته لاړ شه. عبدالصبور بلجیم ته ورځي چېره چې د کډوالو وضعیت اندېښناک دی. په بلجیم کې عبدالصبور یوه رضاکاره سره اشنا کېږي. یادې رضاکاره هڅه کوي چې له عبدالصبور سره مرسته وکړي. د هغې په مرسته عبدالصبور له ژرژ سره اشنا کېږي چې فرانسوۍ دی او د عبدالصبور هرکلی کوي.

پناه غوښتنه

عبدالصبور د فرانسوي چارواکو له چلند څخه راضي نه دی. وایي چې د پناه غوښتنې نه وروسته اقامت کارټ اخیستی دی خو یوازې د یوه کال له پاره. اوس یې مجبور دی چې بیا او بیا خپل کارټ تمدید کړي.

څرګنده خزانه

خو عبدالصبور یوه څرګنده خزانه هم لري: انځورونه. هغه د خپل اوږد سفر په ترڅ کې د یو موبایل له لارې انځورونه اخیستي دي. په دې انځورو کې سړۍ هر شی لیدلای شي: د کډوالو وضعیت په کمپونو کې، د بندي خانې انځور، د لارې انځور او... په پاریس کې عبدالصبور له یوه سازمان سره په تماس کې دی: «په پاریس کې د تبعیدي هنرمنانو آتلیه». عبدالصبور د همدې انجمن په مرسته انځورونه یې نندارې ته وړاندې کوي. هغه د «ګود چانس تیاتر» سره هم همکاري کاوه. راته وایي چې د کډوالو وضعیت په «ګود چانس تیاتر» کې ډېر ښه و او دوی ټول خوشحاله ول.

راتلونکی

سره له دې چې عبدالصبور په فرانسه کې قبول شوی دی او اوس زیات شمېر کسان سره اړیکه لري خو له خپل ژوند نه خوښ نه دی. هغه وايي چې دا نوی کلټور یې نه خوښېږي. د عبدالصبور په وینا په فرانسه کې ژوند سخت دی. په همدې حال چې ما سره کیسه کوي تېلېفون یې په دوامداره ډول مصروف دی. ورته وایم چې ژوند همداسې دی، کله اسانه او کله سخت. په خوله یې مسکا ده خو هېڅ نه وایي.


 

نورې ليکنې