قاضیان نه غواړي له ایټالیا څخه راغلي کډوال بېرته دغه هیواد ته اخراج کړي، رویترز
قاضیان نه غواړي له ایټالیا څخه راغلي کډوال بېرته دغه هیواد ته اخراج کړي، رویترز

فرانسه کې دوې محکمې د ایټالیا هغه غوښتنه رده کړه چې له مخې یې له ایټالیا څخه راغلي پناه غوښتونکي باید بېرته دغه هیواد ته واستول شي. د مولون (سېن – اې – مارن) او پو (پیرېنې – اټلانتیک) محکمې وایي چې ایټالیا کې د پناه غوښتلو سیستم کمزوری دی.

فرانسه کې دوې اداري محکمې د ایټالوي چارواکو هغه غوښتنه رده کړه چې له مخې یې کډوال باید بېرته ایټالیا ته واستول شي. دواړې محکمې وایي چې ایټالیا کې د پناه غوښتلو سیستم ضعیفه او کمزوری دی.

«ایټالیا کې له کډوالو سره د غیرانساني رویې خطر شته»

د پنج شنبې پر ورځ (د اکتوبر ۱۱مه نېټه) د مولون محکمې د ایټالیا د مهاجرت چارواکو هغه غوښتنه رده کړه چې له مخې یې پناه غوښتونکي باید بېرته دغه هیواد ته واستول شي. فرانسوۍ ورځپاڼه لو دوفینې وایي: «د قاضي په حواله د ایټالیا د مهاجرت چارواکي منلي چې دوی نه شي کولی غوښتنې ته په سم او قانوني ډول رسيدګي کړي.»

همداراز د دوشنبې پر ورځ (د اکتوبر ۱۵مه نېټه) د پو اداري محکمه هم پرېکړه وکړه چې شرایط اخراج ته مساعد نه دي. د دې محکمې قاضي وویل چې د بې سرحده ډاکټرانو، د بخښنې د نړیوال سازمان او د ملګرو ملتونو د بشري حقونو کمیټې د رپوټونو پر بنسټ، ایټالوي سیستم کمزوری دی او ممکن له کډوالو سره غیرانساني چلند وکړي. د پو د محکمې په حواله ایټالیا کې کډوال د اوسېدو ځای د پیدا کولو او د روغتیا په برخو کې له ستونزو سره مخامخ دي.

د ځینو سازمانونو د رپوټونو له مخې اوس مهال ایټالیا کې پناه غوښتل سخت – او حتی ناممکن – دی. د بخښنې نړیوال سازمان وایي، چې په ۲۰۱۷-۲۰۱۸ کې ایټالیا کې د پناه غوښتونکو شمېر ۱۳۰۰۰۰ ته رسېږي خو ټولو ته رسیدګي نه کېږي.

د ایټالیا نوي سیاستونه او فرانسه کې مخالف دریځ

فرانسوۍ مدافع وکیله سېلوینا پاتر کډوال نیوز ته وایي: «ایټالیا کې د ماتیو سالویني نوي سیاستونه د دې پرېکړې لامل شو.»

دا لومړی ځل نه دی چې فرانسه کې محکمې د ایټالیا د پناه غوښتلو سیستم له نواقصو او موجود تشو څخه پرده اوچتوي.

ایټالیا کې ماتیو سالویني قدرت ته تر رسېدو وروسته وویل چې د ناقانونو کډوالو ضد سیاست ته لومړیتوب ته ورکوي. د ښاغلي سالویني په حکومت کې د دې هیواد بندرونه د ژغورنې کښتیو پر مخ وتړل شول. ماتیو سالویني دا هم وویل چې ممکن ځینې کډوال لیبیا ته اخراج کړي.

په همدې حال کې د فرانسې ولسشمر امانویل مکرون غواړي چې زیات شمېر کډوال ایټالیا ته اخراج کړي.

په ۲۰۱۷ کې ۲۳۳۰ کسان بېرته ایټالیا ته اخراج کړل شول.

 

نورې ليکنې