ګبرو مېهاري او هادوش تسېګي د ۲۰۱۸م کال د سپټمبر په میاشت کې فوندائو ته رسېدلي دي. دوی د کرهنې په برخه کې کار کوي. کرېډېټ: مایوه پولې / کډوال نیوز
ګبرو مېهاري او هادوش تسېګي د ۲۰۱۸م کال د سپټمبر په میاشت کې فوندائو ته رسېدلي دي. دوی د کرهنې په برخه کې کار کوي. کرېډېټ: مایوه پولې / کډوال نیوز

پورتګال په اروپا کې داسې یو هیواد دی چې د بېلابېلو لاملونو له کبله د کډوالو پر وړاندې نرم دریځ او سیاست لري. تېر کال له مدیترانې څخه تر اتیاوو ډېر ژغورل شوي کډوال د پورتګال هیواد له خوا ومنل شول. د کډوال نیوز خبریاله مایوه پولې پورتګال ته تللې او د هغو ۱۹ کډوالو د ژوند په اړه رپوټ ورکوي چې د ۲۰۱۸ کال په جولای میاشت کې له سمندره وژغورل شول او له سپټمبر راهیسې د پورتګال د فوندائو ښار په یوه پخواني مذهبي ښوونځي کې اوسېږي.

اګوستینا په خندا سره وایي: «پورتګال ته تر را تلو مخکې مې فکر کاوه چې ښايي دا د اېټالیا کوم ښار وي!» نوموړې د نیجریا ده او ۱۹ کلنه وه چې مهاجره شوه. اګوستینا د ۲۰۱۸ کال په جون میاشت کې د لیبیا له ساحلي اوبو څخه د اکواریوس کښتۍ له خوا وژغورل شوه او په آخر سر کې پورتګال ته ولېږدول شوه.

د اکواریوس کښتۍ له خوا ۱۸ تنه نور ژغورل شوي کسان – ارېتریايي، نیجریايي، یمني او سوډاني کډوال – هم سپټمبر میاشت کې د پورتګال فوندائو ښار ته ولېږدول شول. فوندائو د پلازمېنې لېسبون په شمال ختیځ کې موقعیت لري.


دوی اوس په یوه پخواني مذهبي ښوونځي کې اوسېږي. د دغه مذهبي ښوونځي د دروازې ترڅنګ د دغو کډوالو بېلابېل انځورونه نندارې ته اېښودل شوي: یوه برخه یې هغه انځورونه دي چې کډوال اېټالیا کې د ښکته کېدو پر مهال ښيي، بله برخه یې هغه عکسونه دي چې پورتګال کې اخیستل شوي. په نوي انځورونو کې د کډوالو څېرې روښانې او خوشحالې معلومېږي. خو د قاچاقي سفر روحي ضربې تر اوسه پورې له هغوی سره دي. ځینې یې وایي چې په جسمونو کې یې مرمۍ موجودې دي، نور یې له بې خوبي او یا د هاضمې اړوند ستونزو څخه شکایت کوي.

د ساختمان په حویلې کې اګوستینا وایي: «اوس پوهېږم چې پورتګال یوه اسوده او ارام هیواد دی.»


د هرکلي ۱۸ میاشتنی پروګرام

پاولا پیو د دغه پخواني مذهبي ښوونځي په یو سالون کې کار کوي. نوموړی د هرکلي مرکز سموونکې ده او کډوالو سره په اداري چارو کې مرسته کوي. هغوی ته همداراز مالي مرستې راټولي او خواړه برابروي. څلور نور کسان، چې دوه تنه یې ستاژران دي، له هغې سره کار کوي. پاولا چې تر دې مخکې د فوندائو ښاروالۍ د ټولنیزو چارو مسوله وه، وایي: «دلته هره ورځ یوه نوې ورځ ده!»

د فوندائو ښاروالۍ د پورتګال د مهاجرو عالي کمیسارۍ (ACM) او د بهرنیانو او پولو خدماتو  (SEF)په مرسته د دغو کډوالو هرکلی کوي. تر دې مخکې دغه مذهبي ښوونځی د هغو افریقایي زده کوونکو او کارکوونکو تمځی و چې په پورتګالي ژبه خبرې کولې.

پاولا وایي: «په لومړیو ورځو کې وضعیت ډېر ښه نه و. دوی مکلف وو چې خپل حقوقي وضعیت معلوم کړي، خپلې روغتیایي ازموینې ترسره کړي او د پورتګالي ژبې کورس ته لاړ شي.» اټکل شوې چې دغه ۱۹ کډوال د یو و نیم کال له پاره دا ځای کې واوسي. دغه موده کې دوی ته طعام ورکول کېږي او له دوی سره په اداري چارو کې مرسته کېږي. کډوال هره میاشت د خپلو خصوصي چارو له پاره ۱۵۰ یورو هم ترلاسه کوي. تر اوسه یوازې یو یمني کډوال له دغه مرکز څخه المان ته تللی ترڅو له خپلې کورنۍ سره یو ځای شي.


کار بازار کې ادغامېدل

دغه کډوال تېر نومبر د استوګنې ۶ میاشتنی کارټونه ترلاسه کړل. د دغو کارټونو په لرلو سره کډوال پورتګال کې د کار کولو اجازه لري.

پاولا وایي: «د ښاروالۍ ټول کارکوونکي هڅې وکړې چې کډوال کار پیدا کړي. موږ له بېلابېلو کسانو سره تماس ونیو. دوی را ته وویل چې کډوال لومړی باید په مالي لحاظ خپلواک شي ترڅو وکړای شي خپلو کورنیو ته پیسې واستوي.» یوازې د ۴ میاشتو په موده کې ۱۳ کډوال فوندائو او نورو سیمو کې ځانونو ته کارونه برابر کړل.

اریتریایي کډوال ګبرو مېهاري او هادوش تسېګي په داسې یو ځای کې کار کوي چې له دغه مذهبي ښوونځي څخه کابو ۲۰ کیلومټره فاصله لري. د یونیتو فارمینګ مسولان هر سهار د کډوالو دغه مرکز ته راځي ترڅو دوی د کار سیمې ته یوسي.


نن ګبرو مېهاري او هادوش تسېګي د لا کینتا دس راساس شوتالو ونو ته رسیدګي کوي. دوی له خپلو همکارانو سره – ځینې نیپالي او اسپانوي کارکوونکي – د اشارې په ژبه خبرې کوي او یا ځینې تخنیکي اصطلاحات کاروي. ګبرو مېهاري په انګریزي ژبه وایي چې تر دې مخکې یې د کرهنې په برخه کې کار نه دی کړی. خو بیا زیاتوي چې کار یې اسان دی. هادوش نه په انګریزي پوهېږي او نه په پورتګالي.

د دغې ډلې مسول ایرس پروئنسا وایي: «دوی هر سهار په ډېر شوق کار ته راځي.»

د کرهنې په ډګر کې د کار زمینې ډېرې دي

هبتوم بیر او ناماریام ګبروکیدان هم له اریتریا څخه راغلي دي. دوی د میوې جوس په یوه فابریکه کې کار کوي. پاولا وایي: «دغه ځای کې د کار زمینې ډېرې دي، ځکه په دې وروستیو کلونو کې پورتګال کې د کرهنې په برخه کې د کارکوونکو شمېر ټیټ شوی.»

تر دې مخکې د پورتګال لومړي وزیر انتونیو کوستا ویلي و چې هیواد یې نويو رسېدونکو کسانو ته اړتیا لري.

د تېر کال له اوړي راهیسې پورتګال څو ځله ویلي چې چمتو دی د اروپا د ادغام پروګرامونو په چوکات کې کار وکړي او کډوال ومني. په ۲۰۱۸ کې له مدیترانې څخه ژغورل شوي ۸۶ کسان پورتګال ته ورسېدل.

د شپې له خوا: «پورتګالي د ټولو له پاره»

اوس د شپې ۷ بجې دي. پاولا خپل دفتر تړلی، خو د پورتګالي ژبې کورس د دغه پخواني ښوونځي په یوه سالون کې پیل شوی دی. دغه کورس د ادغام او د تخصصي زده کړو انستیتیوټ د یوې ښوونکې له خوا مخ ته وړل کېږي او سیمه کې د ټولو بهرنیانو له پاره دي.

ګبرو له کاره مرکز ته رسېدلی او اوس د پورتګالي ژبې په کورس کې ناست دی.

ګبرو وایي چې پورتګالي تر ټولو لوی چېلېنج دی. خو نوموړی غواړی چې زده یې کړي. ګبرو وایي، که دوسیه یې ومنل شي نو پورتګال کې پاتې کېږي او خپله ښځې او خپل دوه ماشومان هم پورتګال ته رابولي. 

 

نورې ليکنې