د پنجشنبې په ورځ (د جون ۶مه) د هنګري یوه محکمه څلور قاچاق وړونکي په عمري بند محکوم کړل. یاد کسان د ۷۱ کډوالو په مرګ کې د لاس لرلو له کبله په عمري بند کې محکوم شوي دي. 

دا پېښه د ۲۰۱۵ کال په اګست کې شوې وه او قربانیان یې د عراق، افغانستان، ایران او سوریې وو. د هنګري سرتېري د قربانیانو جسدونه هغه لارۍ کې وموندل چې له اتریش سره په سرحد کې پرېښودل شوی و. 

محکوم شوي کسان یو افغان او درې بلغاریایان دي. د محکمې د یو قاضي په خبره دوی د کډوالو له مرګوني حالت خبر وو، خو هېڅ یې و نه کړل.  

یاده پېښه کې ټولټال ۷۱ کسان ووژل شول چې په ډله کې یې ۵۹ نارینه، ۸ ښځې او ۴ ماشومان وو.

بالقان مسیر کې دا پېښه تر ټولو خونړۍ بلل شوې ده.