د نوې دېموکراسۍ ګوند مشر کیریاکوس میتسوتاکیس له خپلې ښځې سره. کرېډېټ: رویترز/کوستاس بالکاس
د نوې دېموکراسۍ ګوند مشر کیریاکوس میتسوتاکیس له خپلې ښځې سره. کرېډېټ: رویترز/کوستاس بالکاس

د یکشنبې په ورځ یونان کې محافظه کار نوې ډېموکراسي ګوند ټاکنې وګټلې. د یونان لومړي وزیر او د سریزا کيڼ اړخې ګوند مشر الکسیس تسیپراس د خپل سیال کیریاکوس میتسوتاکیس بریا منلې او زیاته یې کړې چې د یونانیانو له «سترو لاس ته راوړنو» څخه دفاع کوي. خو اوس پوښتنه دا ده چې د دې ټاکنو اغېزې به د کډوالو پر ژوند او وضعیت څه وي.

یونان کې تر اوږدمهال اقتصادي کړکېچ وروسته د دې هیواد د لومړي وزیر الکسیس تسیپراس دنده پای ته رسېږي . نوموړی چې د ۲۰۱۵ په ټاکنو کې بریالی شوی و، د یکشنبې په ورځ (د ۲۰۱۹م کال د جولای ۷مه) د یونان ټاکنې د محافظه کار ګوند نوې دېموکراسي نوماند کیریاکوس میتسوتاکیس ته وبایللې.        

سربېره له دې چې په تېرو څو کلونو کې یونان کې د کډوالۍ پر مدیریت انتقادونه کېدل، د ښاغلي تسیپراس اداره وایي هڅه یې وکړه چې یونان کې د پناه غوښتونکو د ادغام او منلو زمینې برابرې کړي. 

خو د نورو اروپایي هیوادونو د فشار له کبله یونان کې د هغو کډوالو په شمېر کې لوړوالی راغی چې د دې هیواد په کمپونو کې بند پاتې دي او په ډېرو بدو شرایطو کې ژوند تېروي.

د لا زیاتو معلوماتو له پاره: د یونان په خطرناکو مهاجر کمپونو کې د ښځو ژوند او ټاپوګانو کې د ښځو او بې سرپرسته ماشومانو وضعیت د اندېښنې وړ دی 

اوس مهال د نوې ډېموکراسۍ ګوند چې کیریاکوس میتسوتاکیس یې مشر دی وایي، غواړي د بهرنۍ پانګې اچونې او د امنیت د ټینګولو په برخه کې په جدي ډول کار وکړي. نوموړی په خپله وینا کې وویل چې یونان په ویاړ سره بېرته خپل سر اوچت کړی او هغه به د ټولو یونانیانو لومړی وزیر وي.

ښاغلی میتسوتاکس تر ټاکنې مخکې فرانسوۍ ورځپاڼې لوموند سره په یوه مرکه کې یونان کې د کډوالو وضعیت یوه «فاجعه باره» وضعیت بللی و. نوموړې ټنیګار کړی چې یونان کې د پناه غوښتنې پروسه اوږده ده او هغه تصمیم لري چې دغه پروسه کې بدلون راوړي.

نوې دېموکراسي ګوند د مهاجرو د سیاست په اړه ویلي چې غواړي د یونان پولو کې امنیت لا ټینګ کړي، د پناه غوښتنې په قانون کې بدلون راوړي او د اروپایي ټولنې او ترکیې د تړون له مخې ترکیې ته د کډوالو د بېرته شړلو پروسه چټکه کړي.

نوموړی همدا راز لوموند سره په مرکه کې ټینګار کړی و چې د بریا په صورت کې د اروپایي ټولنې له مادي مرستو څخه په مناسب ډول ګټه اخلي او د اروپا د پولو ساتنې پوځ د جوړېدو هڅه کوي. 

نوې دېموکراسي ګوند په خپله تګلاره، چې اته اقدامات نومېږي، د کډوالو کړکېچ په اړه توضیحات ورکړي دي. د یادو اقداماتو له مخې:

  • رد شوي کډوال ترکیې ته واستول کېږي
  • پولو کې امنیت لا ټینګېږي: مانا یې دا چې هلته له نوو تخنیکي وسایلو څخه کار اخیستل کېږي او د ګزمه کوونکو په شمېر کې زیاتوالی راځي
  • د هرکلي موقتو مرکزونو پرانیستل چېرې چې د ۶ اوونیو په موده کې د کډوالو غوښتنې څېړل کېږي
  • ښوونځيو کې د هرکلي ځانګړو ټولګيو جوړول چېرې چې د منل شویو کډوالو ماشومانو ته د ادغام زمینه برابرېږي

خو په همدې حال کې د Generation 2.0 سازمان یوې څېړونکې جکي ابولیمان چې یونانۍ ټولنه کې د ځوانو کډوالو د مساواتو په برخه کې کار کوي کډوال نیوز ته وایي: «سره له دې چې لومړی وزیر تر اوسه خپله دنده نه ده پیل کړې خو حداقل دومره ویلی شو چې محافظه کار ګوند د کډوالو په اړه روښانه دریځ لري.»

یاد سازمان د ټاکنو پر مهال ټولو ګوندونو ته د پوښتنو لېستونه ورکړي وو څو دوی د مهاجرو کړکېچ په اړه خپل ځوابونه ولیکي. خو آغلې ابولیمان وایي چې د نوې دېموکراسۍ ګوند دغو پوښتنونه ته ځواب ور نه کړل.

په ۲۰۱۶م کال کې ترکیه او اروپایي ټولنه یو داسې تړون لاسلیک کړ چې هدف یې یونان ته د کډوالو د تګ مخنیوی و. د یاد تړون له مخې هغه کډوال چې یونان کې د پناه غوښتنه نه کوي او یا دلته یې غوښتنه رد شوې بېرته ترکیې ته استول کېږي.

سره له دې چې د یاد تړون تر لاسلیکېدو وروسته یونان کې د راتلونکو کډوالو په شمېر کې کموالی راغلی خو نن سبا هم ګڼ شمېر کسان د ځمکې او یا سمندر له لارې ځان یونان ته رسوي.

څه موده وړاندې ښاغلی میتسوتاکیس لېسبوس او ساموس ټاپوګانو کې د کډوالو کمپونو څخه لیدنه وکړه. نوموړی پر لومړي وزیر تسیپراس نیوکه وکړه چې د تړون په عملي کېدو کې پاتې راغلی دی.

د یادونې وړ ده چې د یکشنبې په ټاکنو کې افراطي ګوند ګولدن داون یوازې ۲ اعشاریه ۹۳ سلنه رایې خپلې کړې دي. یاد ګوند چې په ۱۹۸۵ کې جوړ شوی یونان کې د کډوالو پر وړاندې د تاوتریخوالیو بېلابېلو پېښې لامل و.

د لا زیاتو معلوماتو له پاره: یونان: «د اټن توره نقشه» یا د کډوالو ضد د تاوتریخجنو پېښو په اړه نندارتون

 

نورې ليکنې