خبرونه
اوشېن وایکنګ په مدیترانه کې. کرېډېټ: انتوني جین/اس او اس مدیترانې
اوشېن وایکنګ په مدیترانه کې. کرېډېټ: انتوني جین/اس او اس مدیترانې

اوشېن وایکنګ کښتۍ کې سپاره ۱۸۲ کډوال ایټالیا کې د کوزېدو اجازه ترلاسه کړه

خپور شوی په : 09/23/2019
له لوري کډوال نیوز خپور شوی په : 23/09/2019

د اس او اس مدیترانې او د بې سرحده ډاکټرانو ژغورونکې کښتۍ اوشېن وایکنګ وایي، سیسیل کې د ۱۸۲ سپرو کډوالو د کوزولو له پاره یې اجازه ترلاسه کړې ده. دا په داسې حال کې ده چې لږ وړاندې د ایټالیا د کورنیو چارو پخوانی وزیر ماتیو سالویني د یو فرمان پر بنسټ مدیترانه کې ژغورونکې کښتۍ د دغه هیواد ساحلي اوبو ته د ننوتلو اجازه نه درلوده.

په داسې حال کې چې نن دوشنبه به مالتا کې د فرانسې، جرمني او ایټالوي چارواکو ترمنځ د کډوالو په اړه غونډه جوړه شي، ایټالیا وایي اوشېن وایکنګ کښتۍ کې سپاره کډوال د دغه هیواد په مسینا بندر کې کوزېدلی شي. اټکل دی چې غونډه کې به له مدیترانې څخه د ژغورل شویو کډوالو د وېشلو پر یو لنډمهال میکانیزم موافقه وشي.  

تېره اوونۍ اوشېن وایکنګ مدیترانه کې ټولټال ۲۱۷ کډوال وژغورل.

د جمعې په ورځ مالتا اوشېن وایکنګ کې ۳۵ کډوال ومنل.

دغه راز ایټالیا د یکشنبې په ورځ (د سپټمبر ۲۲مه) اعلان وکړ چې کښتۍ کې پاتې ۱۸۲ کسان د دغه هیواد په مسینا بندر کې کوزېدلی شي.

اټکل دی چې یاده کښتۍ به سه شنبه سهار مسینا بندر ته ورسېږي.

اوشېن وایکنګ کې سپاره کډوال له افریقایي هیوادونو سره تړاو لري او په ډله کې یې یو نوی زېږېدلی ماشوم او ۱۳ نور کم عمره کسان هم دي.

د کډوالۍ نړیوالې ادارې د شمېرو له مخې د روان کال تر دې دمه ۶۵۷۹ کډوال د سمندر له لارې ایټالیا ته رسېدلي او ۲۲۶۰ نور تنه خپل ځانونه مالتا ته رسولي دي.

یاده اداره همدا راز وایي چې ایټالیا ته ډېری نوي رسېدلي کسان د ایټالوي چارواکو له خوا ژغورل شوي او یوازې ۱۱ اعشاریه ۳ سلنه یې د ژغورونکو کښتیو له خوا ژغورل شوي دي.

دغه راز ۳۸ اعشاریه ۵ نور کسان په لرګینو بېړیو کې ایټالیا ته رسېدلي دي.

ایټالیا تېره اوونۍ اوشېن وایکنګ ته اجازه ورکړه چې ۸۲ نور کسان لمپدوسا بندر کې ښکته کړي.


 

نورې ليکنې