د ۲۰۱۹ د نومبر ۲۴مه: لمپدوسا بندر ته نږدې د کډوالو یوه کښتۍ ډوبه شوه. کرېډېټ: رویترز/مورو بوکارېلو
د ۲۰۱۹ د نومبر ۲۴مه: لمپدوسا بندر ته نږدې د کډوالو یوه کښتۍ ډوبه شوه. کرېډېټ: رویترز/مورو بوکارېلو

د شنبې په ورځ (د نومبر ۲۳مه) د ایټالیا لمپدوسا ټاپو ته نږدې د کډوالو یوې کښتۍ د ډوبېدو له کبله د ۵ ښځو په ګډون لږترلږه ۷ کډوال ووژل شول. یاده کښتۍ کې ۱۵۰ کډوال سپاره ول.

د یکشنبې په ورځ (د نومبر ۲۴مه) د ایټالیا لمپدوسا ټاپو ته نږدې د ۵ ښځو په ګډون د ۷ کډوالو مړي وموندل شول. د دغو کډوالو کښتۍ د شنبې په ورځ مدیترانه کې ډوبه شوې وه.

د ایټالیا ساحلي ګارد په یوه خبرپاڼه کې وویل چې د درېو ښځو جسدونه په سمندر کې د یوه ګزمه کوونکي او د دوو نورو کډوالو مړي په ساحل کې د ګمرکي چارواکو له خوا موندل شوي دي.

د ایټالیا ساحلي ګارد زیاته کړې چې دوه جسدونه یې د شنبې په شپه د لمپدوسا په سوېلي ساحل کالا ګالېرا کې موندلي دي.

د سرچینې په حواله سمندر کې د هوا د خرابو حالاتو او د څپو د لوړوالي له امله د کډوالو د ژغورنې عملیات په سختو شرایطو کې ترسره شول.

ساحلي ګارد د شنبې په ورځ اعلان کړی و چې له لمپدوسا څخه دوه کیلومتره لرې یې نږدې ۱۵۰ کسان ژغورلي دي. خو د ژغورل شویو په حواله شاوخوا ۲۰ کسان تر اوسه لادرکه دي.

د ایټالوۍ رسنیو له مخې یوه اریتریایي او یوه لیبیایي کډوال ویلي چې خپلې ښځې یې له لاسه ورکړې دي.

تېره اونۍ سمندر کې د هوا حالاتو د ښه کېدو او د لیبیا په پلازمېنه طرابلس کې د جګړو له کبله له مدیترانې څخه د تېرېدونکو کډوالو په شمېر کې زیاتوالی راغلی و. ویل کېږي چې یوازې په ۴۸ ساعتونو کې نږدې ۶۰۰ کډوالو د مدیترانې له لارې اروپا ته د راتګ لپاره هڅې کړې وې.


 

نورې ليکنې