د اوشېن وایکنګ کښتۍ له خوا ژغول شوي کډوال. کرېډېټ: اس او اس مدیترانه
د اوشېن وایکنګ کښتۍ له خوا ژغول شوي کډوال. کرېډېټ: اس او اس مدیترانه

د الان کردي په نامه ژغورونکې کښتۍ د پنجشنبې په ماسپښین د لیبیا په ساحلي اوبو کې ۸۴ کسان ژغورلي دي. دغه راز د اوشېن وایکنګ ژغورونکې کښتۍ د پنجشنبې په شپه ۶۰ کډوال ژغورلي دي.

د پنجشنبې په ورځ د مرکزي مدیترانې په ژغورنې زون کې الان کردي او اوشېن وایکنګ ټولټال ۱۴۴ کډوال ژغورلي دي.

سي ای سازمان په خپله ټویټر پاڼه لیکلي چې لومړي عملیات د دې سازمان کښتۍ الان کردي له خوا ترسره شول چې په پایله کې یې د ۲۱ ښځو او ۳ ماشومانو په ګډون ۴۴ کډوال ژغورل شوي دي.

څو ساعته وروسته الان کردي یوه بله کښتۍ وژغورله چې د درېو ماشومانو په ګډون ۴۰ کسان پکې سپاره ول. یاد سازمان زیاتوي چې د عملیاتو پر مهال یوه ښځه بې هوشه شوې وه خو اوس یې وضعیت ښه دی.

بل پلو د بې سرحده ډاکټرانو سازمان په خپله ټویټر پاڼه لیکي چې کښتۍ یې د پنجشنبې په شپه ۶۰ کډوال د لیبیا په ساحلي اوبو کې ژغورلي دي.

د ژغورل شویو په ډله کې ۱۸ کم عمره کسان او دوه ښځې هم دي چې ډېری یې د بنګله دېش او اریتریا څخه راغلي دي.

دغه درې واړه عملیاتونه له هغې وروسته ترسره شول چې د الارم فون په نامه تېلېفوني پلټفورم د کډوالو د خراب وضعیت په اړه ژغورونکو کښتیو ته اطلاع ورکړه. یاد پلټفورم دغه راز لیبیایي، مالتایي او ایټالوي چارواکو ته د یادو کډوالو په اړه اطلاع ورکړې وه.

اوشېن وایکنګ اوسمهال مرکزي مدیترانه کې د نورو کښتیو په لټه کې ده.

الان کردي د ایټالیا لمپدوسا ټاپو او مالتا په لور روانه شوې او د یو خوندي بندر پرانیستلو ته انتظار باسي.

 

نورې ليکنې