سباستیان کورز د اتریش لومړۍ وزیر: رویترز
سباستیان کورز د اتریش لومړۍ وزیر: رویترز

د ۲۰۱۹ په سپتمبر کي د اتریش د بیا ټاکل شوي مشر، ځوان چانسلر زباستیان کورتس د سه شنبې په ورځ د وفادارۍ لوړه وکړه. خو نوموړي د اتریش د شین ګوند سره د ائتلافي حکومت د جوړولو سربېره د دغه هیواد د کډوالۍ پالیسي نه بدلوي.

تر ۷ میاشتو غیرحاضۍ وروسته سباستیان کورتس د اتریش حکومت ته بېرته راغلی دی. دغه ځوان چانسلر له شین ګوند سره تر څو میاشتو خبرو اترو وروسته د سه شنبې په ورځ (د جنورۍ ۷مه) د وفادارۍ لوړه وکړه.

د اتریش شین ګوند د سپتمبر په ټاکنو کې دویم مقام ترلاسه کړ او د اتریش په تاریخ کې د لومړي ځل لپاره په دغه هیواد کې واک ته ورسېد. د اتریش پخواني ایتلاف د ښې اړخې ګوند (FPO) سره جوړ شوی و.  

ټاکنو کې د شین ګوند تر بریا وروسته سباستیان کورتس وویل چي له دغه ګوند سره به جوړ جاړی کوي. په دغه ایتلافي تړون کې راغلي چې د اتریش حکومت به د دغه هیواد د اقلیمي بدلون سیاست جوړوي. تړون کې دا هم راغلي چې حکومت به په اداري او حکومتي چارو کې د ړونتیا د رامنځته کولو ژمن دی.

خو مهمه خبره دا ده چې ښاغلی کورتس نه غواړي خپل د کډوالۍ پخواني سیاست کې بدلون راولي.

نوموړي ویلي چې د کډوالۍ او امنیت په برخو کې به یوه ثابته پالیسي ولري.

دغه ځوان مشر دا هم ویلي چې هغه پر اروپایي هیوادونو د هغو کډوالو د وېشلو مکانیزم سره مخالف دی کوم چې د مدیترانې څخه ژغورل کیږي. اوس مهال یوازې ۴ اروپایي هیوادونه دغه پروسه کې برخه اخلي: فرانسه، جرمني، ایټالیا او مالتا.

زباستیان کورتس په ۲۷ کلني کې د بهرنیو چارو وزیر په توګه ټاکل شوی و. په کال ۲۰۱۶ کې یې د کډوالو پر مخ د بالکان لارې بندولو وړاندیزکړی و. هغه د خپلې سیاسي کورنۍ په شان د مهاجرت خلاف دی. د ښاغلي کورتس سیاسي تګ لاره د اتریش د ښې اړخې ګوند په څېر ده. د همدې لپاره نوموړی په ۲۰۱۷م کال کې واک ته تر رسېدو وروسته د یاد ګوند سره ایتلاف کړی و.

تېر سپتمبر د شین ګوند مشر ورنر کوګلر د ښاغلي کورتس په اړه وویل چې د هغه په اند نوموړی ازادې مفکورې لري.

سباستین کورتس تر ټاکنو وروسته هڅه وکړه چې د ائتلافي حکومت د جوړلو لپاره له دغه ګوند سره خبرې اترې وکړي. په دغو خبرو اترو کې مسله په دویمه درجه کې مطرح وه او اصلي خبرې د اقلیمي بدلون په اړه وې.

خو په همدې حال کې د اتریش ولسمشر الکساندر وان ډیر بیلن ښاغلي کورتس ته ویلي چې د محافظه کار او شین ګوندونو تر منځ ائتلاف ماتېدونکی ده: «اتریش له تاسو څخه ډېر څه تمه کوي. هغه اعتماد چې دوی یې تاسو ته کړی اوس باید پیاوړی شي، ځکه چې زموږ ډیموکراسي او زموږ ارګانونه د خلکو باور پر بنسټ ولاړ دي.»

 

 

نورې ليکنې