دغه کډوال د لیبیا په ساحلي اوبو کې ژغورل شوی. کرېډېت: د بې سرحده ډاکټرانو سازمان، هانا والاس بومن
دغه کډوال د لیبیا په ساحلي اوبو کې ژغورل شوی. کرېډېت: د بې سرحده ډاکټرانو سازمان، هانا والاس بومن

د اس او اس مدیترانې سازمان د دوشنبې په ورځ وویل چې د سیسیل په پوزالو بندر کې یې د ژغورل شویو ۳۹ کډوالو د ښکته کولو اجازه ترلاسه کړې. یاد کسان تېره جمعه د لیبیا په ساحلي اوبو کې ژغورل شوي وو.

د اس او اس مدیترانې سازمان په خپله ټویټر پاڼه لیکلي چې اوشېن وایکنګ کښتۍ کې سپرو ۳۹ کډوالو د ایټالیا د سیسیل سیمې په پوزالو بندر کې د ښکته کېدو اجازه ترلاسه کړې.

دغه ۳۹ کسان، چې ډېری یې بنګله دېشیان دي، د جمعې په سهار د لیبیا په ساحلي اوبو کې ژغورل شوي وو. د ژغورل شویو په ډله کې ۱۹ کم عمره کسان او ۵ ښځې هم دي.

د دغو بنګله دېشیانو د ژغورنې عملیات له هغې وروسته ترسره شول چې مدیترانه کې د مهاجرو د ژغورنې تلېفوني پلټفورم الام فون د شپې په ۲ بجو د یوې داسې کښتۍ په اړه اطلاع ترلاسه کړه چې له کاره لوېدلې وه.

اوشېن وایکنګ په یو وخت کې د ۲۰۰ تر ۲۵۰ کډوالو ظرفیت لري. 

اوسمهال د مرکزي مدیترانې د ژغورنې او لټون په زون کې د سي ای سازمان ژغورونکې کښتۍ ایلان کردي د مهاجرو کښتیو د لټولو دندې ته ادامه ورکوي.

په تېرو څو وختونو کې لیبیا کې د خلیفه حفتر او د دغه هیواد د ملي حکومت ترمنځ د روانو جګړو له امله د هغو کډوالو په شمېر کې زیاتوالی راغلی چې د مدیترانې له لارې له لیبیا څخه اروپا ته د راتګ هڅه کوي. 

 

نورې ليکنې