د سلوانیا او کروېشیا ترمنځ سرحدي دیوال. کرېډېټ: کډوال نیوز
د سلوانیا او کروېشیا ترمنځ سرحدي دیوال. کرېډېټ: کډوال نیوز

سلوانیا وایي چې د کډوالو د مخنیوي لپاره یې له کروېشیا سره پر ګډه پوله د خنډونو د جوړولو کار یې پیل کړی دی.

د سلوانیا د کورنیو چارو وزارت نن اعلان وکړ چې له کروېشیا سره پر ګډه پوله یې د خنډونو د جوړولو کار پیل کړی دی.

د دغه وزارت په حواله ټاکل شوې چې د روان میلادي کال په ترڅ کې د ۴۰ کیلومترو په اوږدوالي ازغن تار لګول کېږي. خو یاد وزارت نه دي ویلي چې دا خنډونه به د پولې په کومه برخه کې موقعیت ولري.

د ۲۰۱۵ کډوالۍ کړکېچ راهیسې سلوانیا له کروېشیا سره ګډه پوله کې د ۱۹۶ کیلومترو په اوږدو کې خنډونه جوړ کړي.

د سلوانیايي پولیسو د شمېرو له مخې د ۲۰۲۰ په لومړیو دوو میاشتو کې ۱۱۶۵ کسان له پولې څخه تېر شوي دي چې د تېر کال پرتله ۸۰ سلنه زیاتوالی ښيي.

د ښې اړخې ګوند لومړي وزیر جانز جانسا مارچ میاشت کې واک ته تر رسېدو مخکې ویلي وو چې د مهاجرو د مخنیوي لپاره به خنډونه جوړوي.

د ۲۰۱۵ او ۲۰۱۶ د کډوالۍ کړکېچ پر مهال نږدې نیم میلیون مهاجر د سلوانیا له لارې ځانونه اروپایي هیوادونو ته ورسول.

 

نورې ليکنې