د ۲۰۲۰ د اګست ۱۰مه: برتانیا ته نوی رسېدلی مهاجر. کرېډېټ: رویترز، پیتر نیکولز
د ۲۰۲۰ د اګست ۱۰مه: برتانیا ته نوی رسېدلی مهاجر. کرېډېټ: رویترز، پیتر نیکولز

تېره شنبه د برتانیا ساحلي دوور ښار په دوو برخو کې مهاجر پلوو او د کډوالو ضد فعالانو لاریونونه وکړل. ډېری هغه کسان چې د مانش کانال له لارې برتانیا ته د ورتګ لپاره هڅه کوي په لومړي سر دوو ښار ته رسېږي.

د برتانوي رسنیو له مخې تېره شنبه د برتانیا دوو ښار کې د مهاجرو ضد فعالانو د مانش کانال له لارې دغه هیواد ته د مهاجرو د ورتګ پر وړاندې لاریون وکړ. 

راپورونه زیاتوي چې د مهاجرو ضد مظاهره کوونکو یوه لاره وتړله او له پولیسو سره یې نښته وکړه.

دوی د برتانیا بېرغونه له ځان سره درلودل او د «ازادۍ» شعارونه یې ورکول. همدا راز ځینو کسانو شعار ورکاوه چې د برتانیا سړکونه باید له دغو «کثافاتو» پاک شي.

په همدې حال کې د برتانیا د کېنت سیمې پولیسو په خپله ټویټر پاڼه لیکلي چې د عامه نظم د اخلال، د راسیستي چلند او د بېړنیو خدماتو له یوه کارکوونکي سره د تاوتریخوالي په تړاو یې لس کسان نیولي دي. 

«موږ د مهاجرو هرکلی کوو»

په ورته مهال د دوور ښار په یوه بله سیمه کې مهاجر پلوه فعالانو د مهاجرو په حمایت کې لاریونونه وکړل.

د کېنت رفیوجي هېلپ ټولنې غړې پیتر کینان مظاهره کوونکو ته وویل کله چې یوه ټولنه له جګړو تښتېدلي کسان ردوي، دا د یادې ټولنې د وضعیت څرګندوي. هغه زیاته کړه: «موږ داسې کسان نه یو. موږ پاڅېږو او د هغو کسانو هرکلی کوو چې په سختو شرایطو کې له وېروونکو حالتونو څخه تښتېدلي دي.»

په داسې حال کې چې کارپوهان وایي د برګزېت له کبله به برتانیا کې د کډوالۍ شرایط نور هم سخت شي، خو د برتانوي چارواکو د شمېرو له مخې یوازې تېره چهارشنبه ۴۰۰ کسان د مانش کانال له لارې دغه هیواد ته رسېدلي دي.

بیا ولولئ: له فرانسې نه بریتانیا ته د اوبو له لارې د کډوالو کمساری اووښتل

تر دې دمخه برتانیا ژمنه کړې وه چې د مانش کانال له لارې به دې هیواد ته د مهاجرو سفرونه پای ته ورسوي.

د برتانیا د کورنیو چارو وزارت په حواله د روان کال له پیل راهیسې تر ۵۶۰۰ زیاتو مهاجرو د مانش کانال له لارې ځانونه برتانیا ته رسولي دي.

 

نورې ليکنې