ملګرو ملتونو د بوسنیا او کروشیا پر پوله د ۵۰ مهاجرو د تاوتریخجن اخراج په اړه د پلټنې غوښتنه کړې

دغو مهاجرو چې ستړي او ستومانه ښکارېدل ویلي د کروشیا له پولې څخه د تېرېدو هڅې پر مهال ځینو کسانو د دوی پیسې، تېلېفونونه او وسایل نیولي او بوسنیا کې هم ځينو د سوټو ګوزارونه پرې کړي دي.

بوسنیا کې د ملګرو ملتونو ماموریت په حواله خیریه سازمانونو له دغو کسانو سره روغتیایي مرستې کړې دي.

د ملګرو ملتونو ادارې یوه خبرپاڼه کې له بوسنیا او کروشیا څخه غوښتي دي چې د پېښې په هکله پلټنې وکړي او عاملینو ته یې سزا ورکړي.

خبرپاڼه کې زیاته شوې چې «د اروپایي ټولنې د بشري حقونو کنوانسیون له مخې د مهاجرو ډله ییز اخراج غیرقانوني دی.»

بیا ولولئ: بوسنیا: «لسګونه ځله مې د کروشیا له پولې د تېرېدو لپاره هڅې کړې، بیا به هم هڅه کوم»

تر اوسه بوسنیایي او کروشیایي چارواکو د پېښې په اړه څه نه دي ویلي. خو تر دې دمخه کروشیایي چارواکو په وار وار له مهاجرو سره د تاوتریخجن چلن په اړه ټولې ادعاوې رد کړې دي.

بوسنیا کې بند پاتې مهاجر هڅه کوي چې د کروشیا له پولې په تېرېدو سره ځان د اروپایي ټولنې غړو هیوادونو ته ورسوي.‌ خو ډېری وختونه له پولې څخه د تېرېدو هڅې سختې او له ګواښونو ډکې دي.

بیا ولولئ: بوسنیا: د لیپا کمپ او بیهاچ ښار ترمنځ اروپا ته د تلونکو مهاجرو ستونزې

د بوسنیا په بیهاچ او ولېکا کلادوشا ښارونو کې ایسار سلګونه مهاجر وایي‌ چې دوی په وار وار کروشیا ته د اوښتو لپاره زیار ایستلی،‌ خو هر ځل پولیسو نیولي او په تاوتریخجنه طریقه یې بېرته بوسنیا ته استولي دي.