کم سنه مهاجر سرپناوو ته لاسرسی غواړي. انځور: مهاجر نیوز، ۲۰۲۰، نومبر میاشت
کم سنه مهاجر سرپناوو ته لاسرسی غواړي. انځور: مهاجر نیوز، ۲۰۲۰، نومبر میاشت

د فرانسې د ماشومانو د حقونو ټولنې په ګډون زیاتو سازمانونو فرانسه کې د کم سنه مهاجرو د برخلیک نه روښانېدو او ورسره د توپیري چلند له امله د ملګرو ملتونو د ماشومانو حقونو کمېټې ته شکایت کړی دی. دوی فرانسه په دې تورنوي چې د ماشومانو له حقونو څخه یې سرغړونه کړې ده.

د فرانسې د ماشومانو د حقونو ټولنې په ګډون زیاتو سازمانونو فرانسه کې د کم سنه کسانو له حقونو څخه د سرغړونې په تړاو ملګرو ملتونو ته شکایت کړی دی. دغه ټولنې خبرداری ورکوي: «دمګړۍ زرګونه بې سرپرسته او کم سنه کډوال یوازې د سازمانونو او متعهدو ښاریانو له مرستې څخه برخمن کېږي، په داسې حال کې چې دوی باید د فرانسې دولتي امکاناتو ته لاسرسی ولري.»

تر دې دمخه ګڼو سازمانونو فرانسه کې د ماشومانو له حقونو څخه د سرغړونې په اړه خبرداری ورکړی دی، خو دا لومړی ځل دی چې دوی یوې نړیوالې ادارې ته مراجعه کوي.

د فرانسې د ماشونو د حقونو شورا، کېدز امپاورمنټ او ځینو نورو سازمانونو پرون دوشنبه اعلان وکړ چې دوی دغې مسلې ته د رسیدګۍ لپاره د ملګرو ملتونو د ماشومانو شورا ته شکایت ثبت کړی دی.

دوی وایي هدف یې دا دی چې فرانسه کې د ماشومانو له حقونو څخه د «جدي او سیستماتیکو سرغړونو» په اړه پلټنې پیل شي.

بیا ولولئ: افغان مهاجر منصور په پاریس کې: «وایم چې کمسن یم خو څوک یې نه مني»

«پر کم سنه ماشومانو شک»

دغه سازمانونه وایي چې فرانسه کې د دغو کسانو نابالغتوب په رسمیت نه پېژندل کېږي – چې له امله یې دوی د ماشومانو د ملي ساتنې امکاناتو څخه بې برخې کېږي – او د فرانسې په دیپارتمنتونو کې یې دوسیې په غیرعادلانه او توپيري توګه ارزول کېږي.

شکایت لیک کې راغلي دي چې فرانسه کې د کم سنه مهاجرو پر وړاندې عمومي شک شته. زیاته شوې: «د رسمي پروټوکلونو له مخې ځینې سندونه مخکې له مخکې د اعتبار وړ نه دي.»

بیا ولولئ: فرانسه: مونپلیه کې درې مهاجر د خپلو عمرونو په اړه د درواغ ویلو په تور محکوم شوي

د نوموړي شکایت لیک له مخې ځینې وختونه د کم سنه مهاجرو د عمرونو د معلومولو لپاره د هډوکو ازموینې ترسره کېږي. حال دا چې د ملګرو ملتونو د ماشومانو کمیټې یادې ازموینې غندلې دي.

په وینا یې ډېری وختونه دغه ازموینې د دې سبب کېږي چې کم سنه مهاجر له خپلو حقونو څخه بې برخې پاتې شي: مانا یې دا چې دغه کسان د سرپناه د نه لرلو له امله دې ته اړ کېږي چې د سړکونو پر غاړه شپه سبا وکړي.

بیا ولولئ: فرانسه د کم عمره کډوالو د اداري او حقوقي چارو په اړه معلومات

«دا وېره شته چې کم سنه مهاجر پر مجرمانو بدل شي»

د فرانسې د ماشومانو د حقونو شورا مشره ارمېل لو بیګو – مکو کډوال نیوز سره په خبرو کې وایي چې د فرانسې په بېلابېلو دیپارتمنتونو کې له کم سنه مهاجرو سره توپیري چلند کېږي. نوموړی زیاتوي چې له ماشومانو سره توپیري چلند د «زغم» نه دی.

شکایت لیک کې راغلي چې په ۲۰۱۹ کې فرانسه کې یوازې ۱۶،۶ سلنه مهاجر د کم سنه کسانو په توګه پېژندل شوي دي. په ۲۰۱۸ کې د فرانسې د عدلیې شورا په یو راپور کې ویلي وو چې مختلفو دیپاتمنتونو کې له کم سنه کسانو سره توپیري چلند د هغوی پر راتلونکي ناوړه اغېز لرلی شي.

سازمانونه وایي چې د دې راپور له خپرېدو درې کاله وروسته وضعیت کې لا هم بدلون نه دی رامنځ ته شوی. د ارمېل لو بیګو – مکو په خبره: «موږ وېره لرو چې دغه کم سنه کسان پر مجرمانو بدل شي.» نوموړې هیله څرګندوي چې د دولت او د سازمانونو ترمنځ د کم سنه مهاجرو د برخلیک په اړه د بحث زمینه برابره شي. په خبره یې: «جرمي ډلې دلته دي او پوهېږي چې له دغو کم سنه کسانو څخه ناوړه ګټه اخیستلی شي.»

دا لومړی ځل نه دی چې فرانسه له کم سنه کسانو سره د توپیري او ناسم چلند له امله تورنېږي. تېره فبروري میاشت د فرانسې د بشري حقونو ملي کمېسیون د کم سنه کډوالو چارو ته د نه رسیدګي له کبله پر دولت نیوکې کړې وې. یاد کمېسیون ویلي وو: «کم سنه مهاجر تر هر څه مخکې ماشومان دي. دوی باید د ماشومانو د ساتنې له حق څخه برخمن شي او اړتیاوې یې دې پوره کړل شي.» دغه کمېسیون په ۲۰‍۱۸ کې ویلي وو چې کم سنه مهاجر باید په چټک ډول ومنل شي.

 

نورې ليکنې