برتانوي ځواکو د افغانستان په هلمند ولایت کې.‌ انځور:‌ رویټرز
برتانوي ځواکو د افغانستان په هلمند ولایت کې.‌ انځور:‌ رویټرز

طالبانو په یوه خبرپاڼه کې ویلي د دوی له خوا هغو افغانانو ته خطر نشته چې د ژباړې، ساتنې او نورو برخو کې یې له بهرنیو ځواکونو سره کار کړی دی. په ورته مهال افغانستان کې د فرانسوي ځواکونو ژباړونکو او همکارانو د فرانسې ولسمشر ته د یو لیک په استولو سره ویلي ژوند یې د طالبانو او داعش له خوا په خطر کې دی.

د طالبانو ډلې نن دوشنبه د جون میاشتې ۷مه په یوه تازه خبرپاڼه کې ویلي د دوی له خوا هغو افغانانو ته «خطر متوجه نه دی» چې له بهرنیو ځواکونو سره یې کار کړی دی.

دوی ډاډ ورکړی چې دغه افغانان کولی شي خپل هیواد کې «عادي ژوند» ته ادامه ورکړي او د خپل تخصص په برخه کې «هیواد ته خدمت وکړي». په وینا یې:‌ «موږ هغه مهال هغوی خپل دښمنان بلل چې مخامخ زموږ د دښمن په صف کې ولاړ وو.»

خو خبرپاڼه کې زیاته شوې چې د بهرنیو ځواکونو افغان همکاران باید له خپلو «تېرو کړنو پښیمانه واوسي».

په می میاشت کې له افغانستانه د نړیوالو ځواکونو د وتلو تر پیل وروسته ځینو افغان ژباړونکو او د بهرنيو ځواکونو پخوانیو همکارانو د خپل خوندیتوب په اړه اندېښنې ښوولې دي.

تر دې دمخه فرانسې او برتانیا اعلان کړی و چمتو دي هغو افغاناتو ته ویزه ورکړي چې په تېرو ۲۰ کلونو کې یې ورسره کار کړی دی.

بیا ولولئ:‌ فرانسه هغو افغانانو ته پناه ورکوي چې له فرانسویانو سره یې کار کړی دی

«طالبان او داعش موږ وژني»

په ورته مهال افغانستان کې د فرانسوي ځواکونو ژباړونکو او همکارانو د فرانسې ولسمشر امانویل مکرون ته د یو لیک په استولو سره ویلي چې دوی له افغانستانه د فرانسوي ځواکونو تر وتلو وروسته په پټه توګه خپل ژوند ته ادامه ورکوي.‌ دوی زیاته کړې چې مرګ ګواښونه یې ترلاسه کړي دي.

لیک کې راغلي:‌ «موږ خپل ژوند او د خپلو ماشومانو او مېرمنو ژوند ته فکر کوو:‌ په دې کې شک نشته چې طالبان او داعش ټول هغه کسان وژني چې له بهرنیو ځواکونو سره یې کار کړی دی.»

دغو افغانانو د فرانسې حکومت څخه د اقامې او ساتنې غوښتنه کړې ده.

 

نورې ليکنې