له ارشیف څخه. د صربیا او هنګري تر منځ سرحد. انځور: رویترز
له ارشیف څخه. د صربیا او هنګري تر منځ سرحد. انځور: رویترز

د هنګري یوې محکمې دوه بوسنیایان اتریش ته د ۱۷ افغانانو په ګډون د ۱۹ کډوالو د قاچاق په تور په بند محکوم کړي دي. د یادولو ده چې د محکمې د دغې پرېکړې تطبیق الزامی نه دی.

د ام تي آی په نامه د هنګري یوه خبري اژانس په حواله دغه بوسنیایان چې عمرونه یې ۲۱ کلونه دي د اکټوبر پر ۵مه د سکسفروار او وارپالوتا پر لویه لاره نیول شوي دي.

د وسپرېم سیمه ییزې محکمې دوی په دوه نیمو کلونو بند محکوم کړي دي، خو د دې پرېکړې عملي کول الزامي نه دي. د محکمې د تصمیم له مخې دغه دواړه کسان د پنځو کلونو په موده کې هنګري ته له سفر کولو منع شوي دي.

د شېنګن ویزه انفو په نامه سایټ خبر ورکوي چې د بوسنیا یادو اوسېدونکو غوښتل په یوه لارۍ کې ۱۷ افغانان، یو ایرانی او یو پاکستانی اتریش ته انتقال کړي.

ویل شوي چې تر دې دمخه یاد مهاجر د صربستان په یوه کمپ کې اوسېدل. دوی اتریش ته د تلو په موخه هنګري ته ځان رسولی و.

بیا ولولئ: رومانیا: له هنګري سره پر پوله د پنځو افغانانو په ګډون لس مهاجر نیول شوي

له دې وړاندې شېنګن ویزه انفو راپور ورکړی و چې هنګریایي چارواکو د روان کال له پیل راهیسې دغه هیواد ته د ۵۴۰۰۰ مهاجرو د ننوتلو مخه نیولې ده او تر ۵۰۰ ډېر قاچاق وړونکي یې په بند محکوم کړي دي.

د هنګري د امنیتي چارو سلاکار ګیورګي باکوندي په حواله د تېر کال د همدې مودې پرتله دغه هیواد ته د رسېدونکو مهاجرو په شمېر کې زښت زیات ډېروالی راغلی دی. تېر کال هنګریایي پولیسو ټولټال ۱۷۰۰۰ مهاجر نیولي وو او ۲۰۰ قاچاق وړونکي یې په بند محکوم کړي وو.

 

نورې ليکنې