د ځایي رسنیو د راپورونو له مخې څلور افغان خبریالان چې افغانستان کې یې ژوند تر ګواښ لاندې و پرون چهارشنبه شمالي مقدونیې ته رسېدلي دي. ټاکل شوې ده چې دوی به نورو لویدیځو هیوادونو ته ولېږدول شي.
د شمالي مقدونیې حکومت ویاند د یوې خبرپاڼې په خپرولو سره ویلي دي چې دغو خبریالانو ځایي ټلویزونونو او راډیوګانو کې کار کاوه.
خبرپاڼه کې زیاته شوې ده چې شمالي مقدونیې د نړیوالو رسنیزو سازمانونو په غوښتنه یادو خبریالانو ته د لنډې مودې لپاره پناه ورکړې ده. دوی اوس د شمالي مقدونیې په پلازمېنه سکوپیا کې اوسېږي او له لنډې مودې وروسته به نورو لویدیځو هیوادونو ته لېږدول کېږي.
شمالي مقدونیه یوه له هغو هیوادونو ده چې افغانستان کې د طالبانو تر واکمنېدو وروسته ځینو اړمنو افغانانو ته پناه ورکړې ده.
بیا ولولئ: یونان د افغانستان د بشري حقونو د فعالانو یوې ۳۵ کسیزې ډلې ته پناه ورکړې
دغه هیواد کې له افغانستانه د ایستل شویو افغانانو شمېر ۵۳۴ تنو ته رسېږي. تر اوسه ۸۵ افغانان له شمالي مقدونیې څخه فرانسې، یونان، ایرلنډ، پرتګال، برازیل او د امریکا متحده ایالاتو ته لېږدول شوي دي.
د دغو کسانو په ډله کې د بشري حقونو فعالان، ژباړن او محصلین شامل دي چې افغانستان کې یې د طالبانو له ګواښونو سره مخ وو.