مدافع وکیله ریمالو د پناه غوښتنې ملي محکمه کې. انځور: کډوال نیوز
مدافع وکیله ریمالو د پناه غوښتنې ملي محکمه کې. انځور: کډوال نیوز

هغه کډوال چې غوښتنلیکونه یې د فرانسې د بې تابعیت وګړو او د کډوالو ادارې یا اوفپرا له خوا رد کېږي کولی شي چې د فرانسې د پناه غوښتنې له ملي محکمې څخه د بیاکتنې غوښتنه وکړي. یاده محکمه کې د مروجو اصطلاحاتو په هکله معلومات.

هغه کډوال چې د فرانسې د بې تابعیت وګړو او د کډوالو ادارې یا اوفپرا ېې غوښتنلیکونه رد کړي دي، کولی شي چې د فرانسې د پناه غوښتنې له ملي محکمې څخه د استیناف غوښتنه وکړي. خو دا یوه پیچلې پروسه ده. کډوال نیوز په دغه محکمه کې د مروجو اصطلاحاتو په هکلو معلومات ورکوي.

«ستاسې دوسیه په غیابي توګه ارزول کېږي»

توضیح: تاسې د قاضي محضر ته نه حاضرېږئ. مانا یې دا ده چې تاسو ته محکمې ته نه ځئ او محکمه ستاسې خبرې نه اوري. قاضي ستاسې د دوسیې تر لوستلو وروسته پرېکړه کوي.

که مو د بیا کتنې په غوښتنلیک کې د اوفپرا د پرېکړې د ردولو لپاره کافي دلایل موجود نه وي، قاضي ستاسې دوسیه په غیابي توګه ارزوي.

مدافع وکیلان کډوال نیوز ته وایي چې ډېری وختونه غیابي محاکمو کې ځواب منفي وي.

تاسې عمومي استماعیه غونډه کې حاضرېږئ

توضیح: د پناه غوښتنې ملي محکمه ګوري چې تاسې د اوفپرا د پرېکړې د ردولو لپاره کافي دلایل لرئ. نو تاسې محکمې ته حاضرېږئ او له خپلې دوسیه څخه دفاع کوئ.

محاکمه د پناه غوښتنې ملي محکمې په ودانۍ کې ترسره کېږي. په لومړي سر کې قاضي او یا قاضیان د دوسیې په هکله د راپور جوړونکي خبرو ته غوږ نیسي. ورپسې ستاسې خبرې اوري. ستاسې مدافع وکیل او ژباړونکي به هم محکمه کې حاضر وي.

راپور جوړوونکی د پناه غوښتنې ملي محکمې هغه کارکوونکی دی چې دوسیه مو ارزوي. هغه ستاسې دلایل، قضایي عناصر او داسې نور شیان ګوري. نوموړی بې طرفه دی او ستاسې د دوسیې په هکله د فیصله کولو صلاحیت نه لري.

تاسې د قاضیانو حضور ته حاضرېږئ

توضیح: د قاضیانو ډله یا «فارمسیون کلژیال» له یو مشر او دوو ارزوونکو څخه جوړېږي. دوی به تاسو ته غوږ ونیسي او ستاسې د دوسیې په اړه به پرېکړه وکړي. د دغې ډلې درې غړي له تاسو څخه پوښتنه کولی شي.

تاسې باید خپله کیسه ورته ووایئ او داسې دلایل ورته وړاندې کړئ چې وښيي د اوفپرا پرېکړه سمه نه ده.

لومړی ارزوونکی د کډوالو په چارو کې د ملګرو ملتونو ادارې له خوا ټاکل کېږي. دویم ارزونکی د دولت شورا د مرستیال له لوري ټاکل کېږي.

تاسې د یو قاضي حضور ته حاضرېږئ

توضیح: مانا یې دا ده چې یو قاضي مو د دوسیې په اړه پرېکړه کوي. هغه له تاسو پوښتنې مطرح کولی شي. ستاسې مدافع وکیل او ژباړونکی په غونډه کې ګډون کولی شي.

دا به یوه چټکه پروسه وي چې ډېری وختونه د مهاجرو په ګټه نه وي. قاضي به ستاسې دوسیه په چټکه او سطحي توګه دوسیه ارزوي.

دا پروسه هغو مهاجرو ته ځانګړې شوې ده چې له «امنو هیوادونو» څخه راغلي دي او یا هغو کسانو ته چې اوفپرا ته یې ناسم معلومات ورکړي دي...

تاسې کولی شئ چې قضایي مرسته وغواړئ

توضیح: فرانسه کې هغه کسان چې عواید یې لږ دي کولی شي چې په دولتي لګښت مدافع وکیل واخلي. دولت کولی شي چې د مدافع وکیل ټول لګښتونه او یا یې یوه برخه ورکړي.

تاسې کولی شئ چې د پناه غوښتنې ملي محکمه کې د مدافع وکیل په مرسته له خپلې قضیې دفاع وکړئ. 

 

نورې ليکنې