بریتانیا کې چارواکي وايي، هغه پنځم کس يي د کډوالو د قاچاق په تور نیولی چې خلک يي په وړو کښتیو کې، په ناقانونه ډول بریتانیا ته لیږدول. د دغې ډلې څلور تنه نور غړي تیره میاشت نیول شوي وو.
بي بي سي د چهارشنبې په ورځ، د بریتانیا د جرایمو سره د مبارزې د ملي ادارې له قوله راپور ورکړ چې دغه پنځم کس له بلجیم څخه بریتانیا ته په کښتیو کې د کډوالو د قاچاق په تور نیول شوی دی.
تورن کس چې ۴۴ کاله عمر لري او د البانیا اصلي اوسیدونکی دی، د جرایمو سره د مبارزې د ملي ادارې د پولیسو لخوا د لافبورو په لسترشر کې نیول شوی دی.
د دغو کسانو په اړه پلټنه او نیول وروسته له هغه پیل شو چې یوه کښتۍ له جرایمو سره د مبارزې د ملي ادارې چارواکو لخوا په برایتلینگسی کې ونیول شوه.
نور ولولئ: بریتانیا ته په لاریو کې د کډوالو د قاچاق په تور درې تنه نیول شوي
د یادې ادارې یو چارواکی درک ایوانز رسنیو ته ویلي:« نیول شوی سړی، په کوچنیو کښتیو کې د خلکو د قاچاق په تورل نیول شوی.» نوموړی وایی چې د سازمان شویو جرمونو سره مبارزه د جرایمو سره د مبارزې د ملي ادارې لومړیتوب دی او په دې اړه څیړنی دوام لري.
څلور تنه نور چې د کډوالو د قاچاق په تور نیول شوي، ګمان کیږي چې په ورته عملیاتو کې يي برخه اخیستې وي. ټاکل شوې چې دوې دروانې میاشتې په وروستیو کې محکمې ته حاضر شي.