زهرا اسمعيلي| Photo: A. Krizanovic via Deutsche Welle
زهرا اسمعيلي| Photo: A. Krizanovic via Deutsche Welle

افغان الاصلې ماډلې او ليکوالي، زهرا اسمعيلي د آلمان په هامبورګ کي د «تبعيد په هکله مقالو» په يوه غونډه کي پر خپلو تجربو خبري وکړې.

زهرا اسمعيلي د «کيوربر بنياد» له خوا د اپريل په ۲۶مه نېټه د آلمان په هامبورګ ښار کي د سږنۍ «تبعيد په هکله مقالو» په غونډه کي مېلمنه وه. په افغانستان کي زېږېدلي دغي مېرمنې په تبعيد کي د ژوند په هکله مقاله واوروله. دغه غونډه د «تبعيدي ورځي» تر عنوان لاندي فعاله ورځو کي جوړيږي چي د شاوخوا ۶۰ سازمانونو او ډلو له خوا تمويليږي. 

زهرا اسمعيلي د خپلې مقالې اورولو پر وخت توضيحات ورکړل چي هغه ولي او څنګه اړه سوه چي خپل اصلي هيواد افغانستان پرېږدي. هغه پر دې وږغېدله چي له خپل هيواد څخه د ليري کېدو وروسته په نوي ټاټوبي کي د کومو ننګونو، کومو ستونزو سره مخامخ او د کومو برياليتوبونو او امکاناتو څخه برخمنه سوه. هغې د خپل هيواد د دودييز کلتور او نوو آزاديو تر منځ پر فشارونو خبري وکړې. 

نوی پېل

اسمعيلي په افغانستان کي زېږېدلې ده او په کابل کي يې روزنه سوې ده. هغې د ديارلس کلنۍ په عمر په ۱۹۹۸ کال د خپلې کورنۍ سره آلمان هيواد ته هجرت وکړ. هغه او کورنۍ يې له خونړۍ کورنۍ جګړې او د طالبانو له رژيم څخه په تېښته کي وه.

اسمعيلي او کورنۍ يې شپږ مياشتي پر خطرناکو لارو سفر وکړ او تر پنځو هيوادونو تير سول تر څو چي د آلمان و سويلي ايالت بايرن ته ورسېدل. هغوی هلته د پناه غوښتنه وکړه.

زهرا اسمعيلي په ۱۷ کلنۍ ماډله جوړه سوه او د نړۍ په بيلو هيوادونو کي يې د ماډلي په توګه کار وکړ. هغه د افغانستان لومړۍ ټاپ ماډله وه چي په نړيواله توګه يې کار کاوه. وروسته دغې مېرمني د ډيزاينري او ليکونکي په توګه کار پېل کړ. 

کلتوري مخامخ کېدنه

د زهرا اسمعيلي داستان د مغلقو کلتوري مخامخ کېدنو له څو سطحي ننګونو سره مل دی. هغه کلتور چي دغې مېرمني ته په ميراث کي رسېدلی ؤ او هغه کلتور چي هغې په نړۍ کي وليد او ورسره مخامخ سوه. په زیاته د ارزښتونو، ليدلورو او توقعاتو تر منځ توپيرونه او واټن ورته لويه ننګونه وه. د بيلو کلتورونو او ارزښتونو بيلو اړخونو د هغې پر ژوند ژوري اغيزې لرلي دي. هغې په ۲۰۱۷ کال د آلمان ږغ دويچه وېله سره په مرکه کي وويل چي دغه بيل اړخونه د هغې د انفراديت او «بېلتوب» لامل سول.

زهرا اسمعيلي وويل چي په آلمان کي په ښوونځي کي ځکه ورته ازار ورکول کيدی چي بهرنۍ وه. په وينا يې خو په کور کي بيا ورباندي فشارونه پراته ول چي د کورنۍ د خوښي پر اساس واده وکړي او دا چي د ماډلينګ خپل کار پرېږدي. هغې وويل چي د هغه باوجوده چي د جنسيت او نژاد له کبله د تبعيض سره مخامخ سوې ده خو غواړي چي مثبت مثال واوسي چي څوک څنګه بايد د نورو سره چلن وکړي.

د خپل ژوند له تجربو څخه په اقتباس دغې مېرمني د (Meine neue Freiheit) «زما نوې آزادي» تر عنوان لاندي کتاب وليکی چي په ۲۰۱۴ کال په آلماني ژبه خپور سو. هغې د پوهاوي او ټولنيزو مرستو په ډګر کي فعاليتونه وکړل. هغه د خپلو فعاليتونو په هکله وايي چي «چيري چي پخوا پرده ځړېدله، زه اوس هلته د راتلونکي بيلي څهرې ښييم.»

په تبعيد کي ژوند

هغې د خپلي وينا پر وخت پر هغه تبعيض خبري وکړې چی دا ورسره مخامخ سوې ده. خو هغې پر هغه امکاناتو او لاسته راوړنو هم رڼا واچوله چي دا په تبعيد کي ورڅخه برخمنه سوې ده. په زياته د خپلي آزادۍ په هکله هغې خوښي وښوده چي په تبعيد کي يې ترلاسه کړې ده. هغې وويل چي تبعيد يوازي د جغرافيې يا مکان سره تړلې موضوع نه ده. د هغې په وينا تبعيد بلکه د انسانانو له خوا رامنځته سوو خنډونو لکه مخکي له مخکي قضاوتونو، بې وزلۍ، تېري او بې عدالتۍ سره هم تړلې موضوع ده.

هغې وويل چي البته ياد خنډونه و خپلو ټاکل سوو اهدافو ته د رسېدو په لاره کي هغه وخت مانع نسي ګرځېدلای کله چي د آزادۍ خواهش لا قوي وي. د اسمعيلي په وينا تبعيد د قوت معنی هم ورکولای سي کله چي خلک د آزادۍ په تلاښ وځي او هغه مومي.

د «تبعيدي ورځو» تر عنوان لاندي دغو غونډو کي د اشخاصو نظرونه په تاريخي او د حال په چوکاټ او لرليد کي ارزول کيږي. په دغه پروګرام کي پر شخصي داستانونو او د افکارو پر تبادله تمرکز کيږي. دا پنځم کال دی چي دغه غونډي جوړيږي.

Webpack App