د ژغورنې نړیواله کمیټه په خپل تازه راپور کې وایي چې د اروپایي ټولنې مشرانو د افغان کډوالو د بیا مېشتولو په برخه کې «لویه بې غوري» کړې ده. د راپور له مخې، سره له دې چي نړۍ کې افغانان د کډوالو درېیم لوی اکثریت جوړوي، خو په ۲۰۲۲ کې یوازې ۲۷۱ افغان کډوالو ته اروپایي ټولنه کې د بیا مېشتېدو زمینه برابره شوې ده.
له پاکستان څخه د يو بشري کوريدور له لاري رسېدلو ۱۵۲ افغانانو ته په روم کي ښه راغلاست وويل شو. ۲۶ نور افغانان هم د نوامبر په ۲۹ نېټه د تهران له لاري ايټاليې ته رسېدلي ول.
د ځایي رسنیو په حواله پرون چهارشنبه له پاکستان څخه درې سوه افغانان د الوتکې له لارې د اسپانیا پلازمېنې مادرید ته وروستل شوي دي. دا په داسې حال کې ده چې له تېرو څو وختونو راهیسې د افغانستان د ګاونډیو هېوادونو څخه په ډله ایزه توګه د افغان کډوالو ایستلو کې کموالی راغلی دی. په ورته مهال زرګونه نور افغانان چې لوېدیځو هېوادونو ته د راتګ انتظار باسي لا هم په پاکستان کې بند پاتې دي.
د «تېښتې» په نامه انېمېشن ډنمارکي فلم جوړوونکي جوناس پوهر راسموس جوړ کړی دی چې سږ کال د اسکار فلم فستیوال په درېو کتګوریو کې نوماند و. دا فلم د افغان مهاجر امین نوابي کیسه انځوروي. فلم جوړوونکی په ځوانۍ کې له یاد مهاجر سره اشنا شوی و. امین اروپا ته له رسېدو شل کاله وروسته خپل ملګري ته د خپل ژوند کیسه وایي.
هالند په دې وروستیو کې په سونو افغانان له افغانستان څخه پاکستان ته انتقال کړي دي. زياته شوې چې په دغو کسانو کې سيمه ایز همکاران او د غير دولتي موسسو کارکوونکي شامل دي.
د بلغاریا ځایي رسنۍ وایي چې د دې هیواد سرحدي ځواکونو په یوه میني بس کې ۴۳ تنه افغان کډوال نیولي دي چې د صربیا پولې خوا ته روان وو.
برتانوۍ ورځپاڼې انډیپنډنت په یوه نوې څېرنه کې موندلې چې له ۲۰۱۶ راهیسې د برتانیا د کورنیو چارو وزارت د هغو افغانانو د منصرف کولو لپاره سیفار شرکت ته لږترلږه ۷۰۲ زره پونډه ورکړي دي چې غوښتل یې دغه هیواد ته کډه وکړي.
ایټالیا افغانستان کې لومړنۍ څارنوالې او د زړورو ښځو د نړیوالې جایزې ګټونکې ماریا بشیر ته تابعیت ورکړی دی. افغانستان کې د طالبانو له واکمنېدو وروسته سم ماریا بشیر یوه له هغو افغانانو وه چې له خپل هیواد څخه ایستل شوې وه.
د سویس د کډوالو اداره وایي سږ کال تر دې دمه تر ۱۵۰۰ ډېر افغان مهاجر دغه هیواد ته رسېدلي دي. دا په داسې حال کې چې افغانستان کې د طالبانو تر واکمنېدو وروسته سویسي چارواکو ویلي وو دوی د زیات شمېر افغانانو د منلو پلان نه لري.