د فرانسې د شمالي سیمې یوې محکمې پرون چهارشنبه یو افغان او یو پاکستانی د دنکرک او بولونی سیمو تر منځ د کډوالو د قاچاق او هغوی ته د ناقانونه اوسېدو لپاره د زمینه برابرولو په جرم په بند محکوم کړل. دغو کسانو د مانش کانال له لارې برتانیا ته تلونکو مهاجرو ته کښتۍ او د سفر وسایل برابرول.
تېره یکشنبه د فرانسې او برتانیا د کورنیو چارو وزیرانو مانش کانال کې د انساني قاچاق پر وړاندې د یو استخباراتي واحد د جوړولو هوکړه لاسلیک کړه. دا په داسې حال کې ده چې له تېرې شنبې راهیسې فرانسوي ځواکونو یاد کانال کې په لسګونو مهاجر ژغورلي دي.
د شمالي مقدونیې پولیس وایي له یونان سره پر پوله یې په یوه لارۍ کې ۲۱۱ مهاجر موندلي دي. دغه کسان د بنګله دېش او پاکستان اصلي اوسېدونکي دي.
د بلجیم فډرال محکمې ویلي چې پرون پنجشنبه بلجیم او برتانیا کې ۱۲ کسان د انساني قاچاقو په تور نیول شوي دي. ویل کېږي چې دغو کسانو بادبان لرونکو کښتیو کې مهاجر له هالنډ څخه برتانیا ته انتقالول
د سلوانیا پولیس وایي چې له کروشیا سره پر پوله یې د دوو لاریو په تانکرونو کې ۲۲ مهاجر موندلي دي.
په ایران کې د افغان کډوالو د ځورونې په غبرګون د یو شمیر اروپايي هیوادونو په ګډون، لندن او واشنګټن کې سلګونه تنه افغانانو د ایران ضد لاریون کړی. بل پلو بیا د کابل د لاریون په غبرګون تهران کې د افغانستان سفیر احضار شوی.
افغان حکومت وايي چې په ایران کې د افغان کډوالو موټر د سوځیدنې پیښې د څیړلو لپاره په نږدې راتلونکي کې ایران ته یو لوړ پوړی پلاوی استوي تر څو په راتلونکي کې د دا ډول پیښو مخه و نیول شي.
د تیرې چهارشنبې په ورځ د ایران په یزد ښار کې د ایراني پولیسو له ډزو وروسته یو موټر چې ۱۲ تنه کډوال يي لیږدول اور واخیست چې وروسته بیا ۳ تنه افغانان پکې و سوځیدل او یو شمیر نور ټپیان شول. دغه پیښه پراخ غبرګونونه راپارولي.
فرانسوي او بلجیمي چارواکو په کال ۲۰۱۹ کې یوه لارۍ کې د ۳۹ ویتنامیانو د مړینې په تړاو نږدې ۳۰ کسان نیولي دي. داسې ګومان کېږي چې دغه کسان د انساني قاچاقو له یوې داسې ډلې سره تړاو لري چې مهاجر له اسیایي هیوادونو څخه اروپا ته انتقالوي. یاده لاري د ۲۰۱۹ په اکټوبر میاشت برتانیا کې موندل شوې وه.
له مارچ میاشتې راهیسې د فرانسې په کاله ښار کې د سمندري ژغورنې ملي ټولنې په مراکزو کې د غلا درې پېښې رامنځ ته شوې دي. تر دې دمخه یادې ټولنې د غلا شوېو بېړیو انځورونه د پلورلو لپاره پر انټرنټ خپاره کړي وو. یوه بېړۍ د بریتانیا په یو ساحل کې وموندل شوه.
د فرانسې په بولونی- سور- مېر سیمه کې یو عراقی برتانیا ته د مهاجرو د قاچاق په تور په ۶ میاشتې بند محکوم شوی دی.
د بلجیم د شمالي بروژ سیمې محکمې پرون چهارشنبه وویل چې بریتانیا ته د مهاجرو د قاچاق په تور یې ۶ کسان بنديان کړي دي. پولیسو دغه کسان د بلجیم په استند ساحل کې نیولي وو.