د اروپایي ټولنې غړو هېوادونو د جمعې په ورځ د مدیترانې له لارې اروپایي ټولنې ته د کډوالو د څپو د مخنیوي لپاره نوې تګلاره تصویب کړه. د دغې تګلارې له مخې به د حکومتونو او ژغورونکو کښتیو ترمنځ همکاري ګړندۍ او پراخه شي.
د صربیا امنیتي ځواکونه وایي چې د جمعې په ورځ یې له هنګري سره پر پوله ۶۰۰ غیرقانوني کډوال نیولي دي. دغه کډوال وروسته له هغه ونیول شول چې د صربیا په هورګوس ښار کې د تېرې پنجشنبې په ورځ د کډوالو ترمنځ نښته کې یو تن په ډزو ووژل شو.
د بلغاریا د کورنیو چارو وزارت وایي چې یوه بلغاریايي موټر چلوونکي د سه شنبې په ورځ د تالاشۍ په پوسته کې د خپل موټر له درولو ډډه وکړه چې له امله یې یو سرتېری او څلور کډوال ټپیان شول. په دغه میني بس موټر کې ۱۲ سوریایي کډوال سپاره ول.
د هغه وروسته چي اروپايي اتحاديې پر سربستان د زياتو افريقايي او آسيايي هيوادونو سره د ويزه نه لرلو لپاره فشارونه وارد کړل، اوس سربستان د تونس او بروندي وګړي په ويزه مکلف کړي دي.
د رومانیا د اراد سیمې پولیس وایي چې له هنګري سره پر پوله په په دوو لاریو کې ۴۶ کډوال موندل شوي دي. دغه کډوال د سوریې، نیپال، سري لانکا او بنګلادېش اتباع دي او غوښتل یې چې هنګري ته واوړي.
د رسنیو د راپورونو له مخې فرانتکس، یوروپول او اسپانیا د اکټوبر د میاشتې په پای کې د بالکان پر لار او په سوېل ختیځه اروپا کې تر ۳۸۰ ډېر کسان نیولي دي چې ۱۵۹ تنو یې د کډوالو په قاچاق کې لاس درلود.
د هنګري چارواکي وایي چې د دغه هېواد امنیتي ځواکونو د روان کال له پیل راهیسې څه باندې ۲۱۵ کډوال نیولي دي. دا هغه کسان دي چې له قانوني اسنادو پرته یې هنګري ته د ننوتو هڅه کړې ده.
د چک جمهوریت چارواکي وایي په پام کې لري چې خپلې خاورې ته د کډوالو د ننوتو د مخنیوي لپاره له سلواکیا سره پر پوله ۳۲۰ تنه نور سرتېري واستوي. په ورته مهال سلواکیا وایي چې د دغه هېواد امنیتي ځواکونو د سپټمبر د میاشتې له پای راهیسې تر ۸۰۰ ډېر ناقانونه کډوال نیولي دي.
د صربیا چارواکو د چهارشنبې په ورځ وویل هنګري ته یې د ۲۰۰ کډوالو د ننوتو مخه نیولې ده. زیاته شوې ده چې د کډوالو له یو کمپ څخه پیسې او وسلې هم ترلاسه شوې دي. بل پلو بیا چک جمهوریت اعلان کړی چې له سلواکیا سره پر پوله کنترول د شلو نورو ورځو لپاره تمدیدوي.
د هنګري، اتریش او صربیا مشرانو پرون دوشنبه اروپا ته د غیر قانوني کډوالو د څپو د مخنیوي لپاره پر یو لړ اقداماتو موافقه وکړه. دغه غونډه چې د صربیا ولسمشر، د هنګري لومړي وزیر او د اتریش چانسلر پکې ګډون کړی و د هنګري په پلازمېنه بوداپست کې جوړه شوې وه.
د شمالي مقدونیې چارواکي وایي چې د پنجشنبې ورځې په سهار د دغه هېواد په سوېلي برخه کې چې له یونان سره ګډه پوله لري د کډوالو یوه ۱۴۲ کسیزه ډله نیولې ده.
د ماشومانو د خونديتوب سازمان (سیف د چلنډرن) د یوه رپوټ پر بنسټ د بالکان په مسیر کې اکثره پناه غوښتونکي ماشومان د وهل ټکول کیدو، جنسي زورونې او ناوړه استفادې په څیر جدي تاوتریخوالي سره مخامخ کیږي.