د بشري حقونو د څار ټولنې پر آلمان باندي له افغانستان څخه د وتلو په ترڅ کې له ملکي افغانانو سره د چلند له کبله نيوکه کړې ده. د تازه معلوماتو له مخې کابو ۲۰ زره افغانان اوس هم آلمان ته د سفر د امکان برابريدو په انتظار دي.
د متحده ایالاتو پولیسو ویلي چې د امریکا د فدرالي پولیسو یوه ډله د هغې لادرکه افغان ماشومې د موندلو په عملیاتو کې برخه اخلي چې دوه اونۍ مخکې لادرکه شوې وه. دغه نجلۍ په ۲۰۱۹م کال کې له خپلې کورنۍ سره امریکا ته تللې وه.
د امریکا د کډوالۍ ادارې تیرو اونیو کې د سلګونه هغو افغانانو د ویزوه غوښتنه رد کړې چې د بشر دوستانه دلایلو له امله يي غوښتل امریکا ته ولاړ شي. دغې پریکړې د کډوالو ملاتړي او خپله کډوال ناراضه کړي.
امریکايي رسنیو ته ځینو سرچینو ویلي چې له کابل څخه قطر ته د تخليي ټولې الوتنې له تیرو دریو اونیو راهیسې له دې امله ځنډول شوې چې طالبانو غوښتل په دغو الوتکو کې خپل کسان او دوې ته نږدې افغانان قطر، عربستان او نور ځایونو ته د کار په موخه واستوي.
سره له دې چې د بریتانیا لومړی وزیر بوریس جانسون د افغانانو د «تود هرکلي» ژمنه کړې وه خو د دغه هیواد د کورنیو چارو وزارت بیا بریتانیا ته د افغانانو د ورتګ شرایط سخت کړي دي.
د بریتانیا د بهرنیو چارو وزارت یو تن پخوانی کارکوونکی له افغانستان څخه د خلکو د ایستلو د پروګرام له امله پر خپل حکومت نیوکه کړې او ویلي دي چې ۱۵۰ زره افغان له خپل هیواد څخه د وتلو غوښتنه کړې خو یوازې ۵ سلنه دغو خلکو سره مرسته شوې.
يوې آلمانۍ چارتر الوتکي ۳۴۵ کسان له کابل څخه و قطر ته انتقال کړل. دغه کسان به وروسته له قطر څخه نورو ځايونو ته انتقال کيږي.
د فرانسې دولت وايي چې افغانستان کې د طالبانو له واکمنیدو راهیسي فرانسې ته د راتګ لپاره ۲۷۰ زره ایمیلونه او ۷۰ زره ټیلفونونه يي ترلاسه کړي دي. په دې کې د هغو افغان کډوالو غوښتنې هم شاملې دي چې کورنیو يي لاهم په افغانستان کې دي.
د قطر حکومت اعلان کړی چې یوه نوې الوتکه چې د افغانستان د فوټبال لوبغاړو په ګډون ۳۵۷ مسافر يي لیږدول د پنجشنبې په ورځ له کابل څخه دوحې ته رسیدلی دی. بل پلو ټاکل شوې چې شاوخوا ۴۰ تنه افغانان نن جمعه بریتانیا ته ورسیږي.
طالبانو د پنجشنبې په ورځ د پاکستان هوايي شرکت ( پي آی اې) او کام ایر څخه غوښتنه وکړه ترڅو د ټکټونو بیې دې د تیر حکومت له معیار سره سم تنظیم کړي. له دې سره د پاکستان هوايي شرکت کابل ته خپل پروازونه درولي دي.
د قطر د بهرنیو چارو وزارت وايي چې د یو شمیر افغان خبریالانو، د افغانستان د کریکټ ملي لوبډلې، او بهرنیو اتباعو په ګډون شاوخوا ۳۰۰ تنه د چهارشنبې په ورځ، له کابل څخه دوحې ته انتقال شوي دي.
د قطر د بهرنیو چارو وزارت خبر ورکړی چې له کابل څخه د قطر هوايي شرکت په یوه الوتکه کې ۲۳۵ نور مسافر دوحې ته رسیدلي دي. چارواکي ویلي چې ډیرۍ دغه مسافر افغانان دي.