کډوال

• یونان

د یونان د کډوالو چارو وزارت نن سه شنبه وویل چې د یونان پلازمېنې اټن ته نږدې د ریتسونا کمپ یوې اوسېدونکې د اټن په روغتون کې له خپل ماشوم زېږولو دوه ورځې وروسته د کورونا ویروس مثبته ازموینه کړې.

• فرانسه

ټاکل شوې چې د روانې اونۍ په پای کې د فرانسې شمالي کالې ښار په کمپونو کې د کورونا ویروس د خپرېدو د مخنیوي لپاره د مهاجرو د سرپناه ورکولو عملیات پیل شي. خو کالې کې مېشت کډوال وایي وېره لري چې د سرپناه ورکولو عملیاتو په پایله کې لېرو پرتو سیمو ته انتقال شي. دوی غواړي چې د مانش کانال له لارې ځانونه برتانیا ته ورسوي.

• سویډن
• پاکستان

پاکستانی خبريال ساجد حسین سويډن کې لادرکه شوی دی. پاکستان کې د ساجد حسین کورنۍ، ملګري او د خبريالانو ټولنې د هغه د خونديتوب په اړه ادېښمن دي.

• هسپانیه
• لیبیا

المانی سازمان سي ای مدیترانه کې د کډوالو د ژغورنې عملیاتونو د بیا پیلولو اعلان کړی دی. الان کردي کښتۍ، چې د سي ای له خوا اداره کېږي، له ۸ اونیو راهیسې د اسپانیا په یو بندر کې درېدلې وه.

• افغانستان
• ايران

ایران کې د افغانستان سفارت چارواکي وایي چې دغه هیواد کې لږترلږه ۵۰ افغان مهاجر د کورونا ویروس ناروغۍ له کبله مړه شوي دي. دا په داسې حال کې چې په تېرو څو اونیو کې له ایرانه افغانستان ته د ستنېدونکو افغان مهاجرو په شمېر کې زیاتوالی راغلی.

• یونان
• ترکيه

د ترکیې د کورنیو چارو وزارت تېره جمعه وویل چې ترکي چارواکو د کورونا ویروس د خپرېدو د مخنیوي لپاره له یونان سره سرحدي سیمې څخه په زرګونو هغه کډوال ایستلي چې غوښتل یې اروپا ته ځانونه ورسوي.

• فرانسه

تېره جمعه د فرانسې د دولت شورا اعلان وکړ چې اداري توقیف خونې، چېرې چې اخراجېدونکي بهرنیان ساتل کېږي، د کورونا ویروس د خپرېدا لامل نه ګڼل کېږي نو ځکه دغه مرکزونه خپلو فعالیتونو ته ادامه ورکوي.

• بريتانيا
• فرانسه

د برتانیا سرحدي ځواکونه وایي چې د کنت سیمې په ساحلي اوبو کې یې په ۶ بېړیو کې سپاره ۹۶ کډوال نیولي دي. بل پلو فرانسوي چارواکو ویلي چې تېره ورځ یې مانش کانال کې ۱۴ کسان ژغورلي دي.

• تاجکستان
• ازبکستان
• روسیه

د رپوټونو په حواله د روسیې پلازمېنه مسکو کې په سلګونو تاجېک او ازبېک کارګر د کورونا ویروس پر وړاندې د نیول شویو تدابیر له امله ایسار پاتي دي. له تېرې اونۍ راهیسې له مسکو څخه تاجېکستان او ازبېکستان ته زیاتې الوتنې لغوه شوې دي.

• یونان
• ترکيه

د یونان د مهاجرو شورا پرون سه شنبه وویل چې د یونان دولت شورا ته یې د پناه غوښتنې د ځنډولو پرېکړې پر خلاف شکایت ثبت کړی دی. تېره فبروري د ترکیې د پولو تر پرانیستل کېدو وروسته د یونان حکومت اعلان وکړ چې د یوې میاشتې لپاره د پناه غوښتنو د ثبتولو پروسه ځنډوي.

• افغانستان
• ايران

د افغانستان د کډوالو او راستنېدونکو چارو وزارت وایي چې ایران کې د کورونا ویروس تر خپرېدا وروسته نږدې ۱۵۰ زره افغان مهاجر افغانستان ته ستانه شوي دي. بل خوا د افغانستان د روغتیا وزارت وایي چې دغه هیواد کې د کرونا ویروس لومړنی قرباني، چې په بلخ ولایت کې مړ شوی، له ایرانه افغانستان ته ستون شوی و.

• فرانسه

د رپوټونو په حواله فرانسوي پولیسو نن سه شنبه سهار د پاریس په شمالي اوبرویلیې سیمه کې د کډوالو یو کمپ خالي کړی دی. دغه له چټلۍ نه ډک کمپ کې په سلګونو مهاجرو په خورا سختو شرایطو کې ژوند کاوه.