د یوې کډوالې انځور د پورت دو لا شاپل په سیمه کې، کرېدېټ: کډوال نیوز

د یوې کډوالې انځور د پورت دو لا شاپل په سیمه کې، کرېدېټ: کډوال نیوز

پاریس: پورت دو لا شاپل کې کډوال په ناوړه وضعیت کې دي

خسرو مانی
له لوري خپور شوی په : 15/08/2018 وروستۍ بڼه : 16/08/2018
د پاریس په پورت دو لا شاپل کې سلګونه کډوال په ناوړه وضعیت کې ژوند کوي. دوی نه یوازې د اوسېدو ځای د نشتوالي له امله سر ټکونه کوي بلکې وایي چې دولت په هېڅ برخه کې دوی ته پاملرنه نه کوي. د کډوال نیوز خبریال دې سیمې ته تللی او له کډوالو سره مرکې کرې دي.
افغان کډوال مهدي چې له دوې اونۍ راهیسې پاریس ته رسېدلی، کرېډېټ: کډوال نیوز
د کډوالو اوږدې لیکه
افغان کډوال مهدي چې له دوې اونۍ راهیسې پاریس ته رسېدلی، کرېډېټ: کډوال نیوز

اوس د سهار ۹ نیمې بجې دي. موږ د پورت دو لا شاپل په هغه سیمه کې یو چې په کې زیات کډوال په یوه لیکه کې د سبا ناري انتظار باسي. د دوی په منځ کې افریقایي، عرب، پاکستاني او افغان کډوال کتلی شو. د انتظار صف اوږد دی او له هره شېبې تر بلې د کډوالو شمېر زیاتېږي. سره له دې چې د مهاجرو وضعیت په دې ځای کې ښه نه دی خو دوی په ارامۍ سره انتظار باسي.

هره سهار د اورور انجمن (Association Aurore) ځینې کارکوونکي دوی ته سبا ناري توزیع کوي.


د سبا ناري په ویشلو ځای کې موږ له ناصر او د هغه ملګرو سره مخ کېږو. ناصر یو ۲۵ کلن افغان کډوال دي چې د بغلان ولایت له ډنډ غوري سیمې سره تړاو لري. له ناصر څخه د هغه د ژوند په اړه پوښتنې کوو او دا چې ولې فرانسې ته راغلی دی. راته وایي: «زه اصلاً ایران کې لوی شوی یم خو د څو مودې له پاره په افغانستان کې وم. دلته هم ټولنیز وضعیت خراب و او هم شخصي ستونزه مې درلوده. نو دا زما یوازنی انتخاب و. په همدې خاطر له افغانستانه وتښتېدم.»

ناصر وایي چې شاوخوا درې کلونه په لاره کې و تر څو چې فرانسې ته ورسېد.

د ناصر یو ملګري محمد یو لوی پل ته اشاره کوي او وایي: «اوس دې پل لاندې ژوند کوو.»

محمد هم افغان دی او وایي چې څو ورځې کېږي چې فرانسې ته رسېدلی.

له دواړو څخه د دوی د ژوند د شرایطو په هکله پوښتنې کوو.

ناصر راته وایي: «د کډوالو ژوند ډېر سخت دی. دې ځای کې کډوال په سړکونو شپه او ورځ تېروي. هوا ورو ورو یخه کېږي او د شپې له خوا باران ورېږي.»

پورت دو لا شاپل کې ټولټال ۷۰۰ افریقایي، افغان او سوریایي کډوال په سړکونو کې شپه او ورځ تېروي. کرېډېټ: مهدي شبیل ، کرېډېټ: کډوال نیوز
«موږ له یوه دوزخ بل دوزخ ته راغلي یو»
پورت دو لا شاپل کې ټولټال ۷۰۰ افریقایي، افغان او سوریایي کډوال په سړکونو کې شپه او ورځ تېروي. کرېډېټ: مهدي شبیل ، کرېډېټ: کډوال نیوز

پورت دو لا شاپل کې کډوال ټول په سړکونو کې ژوند کوي. موږ له ناصر او محمد سره هغه ځای ته ځو چېره چې نور کډوال په کې اوسېږي. د پورت دو لا شاپل د تراموا د تمځای تر شا کډوال له اوسپنې څخه ځان ته د خیمې په شان سرپناه ګانې جوړې کړې دي. هر یو یې یوه نالۍ لري او په هر سرپناه کې څلور او یو پنځه کسان اوسېږي.

تمیم یو بل ځوان کډوال دی چې له کابل څخه راغلی دی. ډېر ستړی مالومېږي. له تمیم څخه د هغه د ستونزې په هکله خبرې کوو. راته وایي: «ستونزې ډېرې دي. موږ د اوسېدو ځای نه لرو. تشناب نشته. نه پوهېږو چې چېرته شاور واخلو. یوه میاشت کېږي چې په دې ځای کې یو. د خپلو تېلېفونونو د چارج کولو له پاره لرې پرتې ځایونو ته ځو. موږ له یوه دوزخ بل دوزخ ته راغلي یو.»

د تمیم په سرپناه کې درې نور افغان کډوال هم ژوند کوي. دوی وایي، چې له څو مودې راهیسې د اوفي د پناه غوښتلو شمېرې ته زنګ وهي او غواړي چې خپل نومونه په لست کې ثبت کړي. خو هېڅوک ځواب نه ورکوي.

د اوفی د نوې شمېرې په اړه لاندې لېنک کېکاږئ: پاریس کې د پناه غوښتلو له پاره باید یوه ځانګړې شمېرې ته تېلېفون کړئ

یوه بله ستونزه له کډوالو سره د پولیسو چلند دی. هغه افغان کډوال چې په پورت دو لا شاپل کې اوسېږي په تاکید سره وایي فرانسوي پولیسو نه پرېږدي چې کډوال حتی په سړکونو کې واوسېږي.

تمیم زیاتوي: «راته وایي چې باید له دې ځای څخه لاړ شو. خو موږ نه پوهېږو چې چېرته تللی شو. موږ ته خونه راکړه یوه ورځ هم دلته نه پاتې کېږو.»

سره له دې چې ناصر او محمد هم له پولیسو ګېله من دي خو هغوی تینګار کوي چې د پاریس ښاروندان له کډوالو سره ښه چلند کوي. دوی زیاتوي چې فرانسه کې کډوالو له پاره باید د اوسېدو ځای برابر شي.


د یاد کډوالو په منځ کې ځینې افغان ماشومان هم کتلی شو. رمضان یو ۱۷ کلن هلک دی چې له افغانستان څخه راغلی دی. هغه وایي چې ډېر وخت په لاره کې و ترڅو چې فرانسې ته ورسېد. خو فرانسه کې لا هم وضعیت یې ښه شوی نه دی.

رمضان زیاتوي: «همدې ځای کې یو او هېڅ نه پوهېږو چې څه باید وکړو. کله چې باران ورېږي موږ له بارانه تښتو او د تراموا په تمځای کې شپه تېروو. کله هم د پورت دو لا شاپل پل لاندې خوب کوو. خو باید اول باید له کتارې څخه تېر شو.»

یاد پل زموږ په څو مټري کې موقعیت لري. محمد وایي غواړي مونږ ته وښایي چې کډوال څنګه له کتارې څخه تېرېږي. بیا په سختۍ سره له کتارې څخه تېرېږي او د پل لاندې ته ځي.

د کډوالو یوه سرپناه، کرېډېټ: کډوال نیوز
ژبه او د معلوماتو کموالۍ
د کډوالو یوه سرپناه، کرېډېټ: کډوال نیوز

خو دا ټول یوازې د کډوالو د ستونزو یوه برخه ده. پورت دو لا شاپل کې زیات کډوال د معلوماتو له کموالۍ هم ګېله من دي. یو ځوان افغان کډوال مهدي چې د سبا ناري له پاره پورت دو لا شاپل ته راغلی دی وایي: «له دوې اونۍ راهیسې پاریس کې یم. په سړکونو کې ژوند کوم او له ډېرې ستونزې سره مخ یم. خو ژبه تر ټولو لویه ستونزه ده. له ما سره سندونه شته خو زه لوستلای نه شم. کله چې له فرانسویانو سره مخ کېږم دوی له ما سره په فرانسوي خبرې کوي.»

مهدی زیاتوي چې نور کډوال هم له داسې ستونزې سره مخ دي.


اجمل یو بل ۲۳ کلن افغان کډوال دی چې له خپلو سندونو سره لالهاند ګرځي. د اوفپرا یا د مهاجرت ادارې د پناه غوښتنې فورمه ورسره ده خو هغه فرانسوي نه پوهېږي. 

اجمل وایي: «دلته یو ادرس لیکل شوی خو نه پوهېږم چې څنګه ورته تللی شم. تېلېفون مې ورک شو او اوس له ما سره هېڅ شی نشته. یوه بله ستونزه هم دا ده چې باید خپلې کیسې اوفپرا ته ورلېږم. کیسه مې لیکلې خو په فارسي ژبه کې. دا باید د یو چا له خوا فرانسوي ته ژباړه وشي.»

د افغان کډوالو سرپناه ګانې، کرېډېټ: کډوال نیوز
«د شپې له خوا په سړکونو کې پاتې کېدل سخت دی»
د افغان کډوالو سرپناه ګانې، کرېډېټ: کډوال نیوز

سره له دې چې د ۱۲ بجو په شاوخوا کې د خواړې توزیع کول ورو ورو پای ته رسېږي کډوال لا هم په پورت دو لا شاپل کې دي. دوی د سړک د کتارې شا ته ناست دي او له یو بل سره خبرې کوي. ځینې هم خپل سندونه ډکوي. 

د دوی په منځ کې ځینې کسان هم شته چې په بانکونو او یا ادارو کې د لیدو وخت لري.

مهدي په وروستيو شېبو کې وایي: «هره ورځ همداسې ده. سبا ناري خوړو، په سړکونو کې ګرځوو، بیا خوب کو. د شپې له خوا په سړکونو کې پاتې کېدل ډېر سخت دی.»  


کورپاڼه/پېښو ته کتنه
حقونه
متن: خسرو مانی
عکسونه: مهدي شبیل